З 12 жніўня па 6 верасня ў зале дакументаў па мастацтве (пам. 306) праходзіць кніжна-ілюстрацыйная выстаўка “Мастак-казачнік”, прысвечаная 140-годдзю з дня нараджэння рускага мастака, графіка, ілюстратара, майстра тэатральна-дэкарацыйнага жывапісу І.Я. Білібіна.
Свет казкі здаўна напаўняў рускае мастацтва і з’яўляўся невычэрпнай крыніцай натхнення для мастакоў. Створаная шматвяковай мудрасцю народа, казка дапамагала зразумець простыя і вечныя ісціны, што знікаюць у мітусні будняў. Творчасць Івана Білібіна з’яўляецца яркім прыкладам увасаблення рускай даўніны. З іменем мастака звязана станаўленне кніжнай графікі як самастойнага віду мастацтва, а яго работы далі магчымасць мастацтвазнаўцам загаварыць пра адметны, абсалютна ўнікальны “білібінскі стыль”, які перадае своеасаблівасць трактоўкі былінных і казачных вобразаў.
Іван Якаўлевіч Білібін (1876–1942) быў шматбаковай асобай, якая спалучала ў сабе мноства талентаў і ўменняў. Ён пакінуў значную спадчыну не толькі ў галіне кніжнай ілюстрацыі, але і ў сцэнаграфіі, тэатральна-дэкарацыйным і манументальным жывапісе, прыкладной і часопіснай графіцы, пейзажным і партрэтным жанры. Работы майстра захапляюць багаццем выдумкі, святочнай узорыстасцю малюнка, усходнімі матывамі, ювелірным аздабленнем дэталяў, бездакорнай цвёрдасцю ліній, за якую мастак атрымаў жартаўлівую мянушку Іван Жалезная Рука.
Сярод прадстаўленых на выстаўцы дакументаў – паэтычныя і маляўнічыя ілюстрацыі І. Білібіна да рускіх народных казак “Царевна-лягушка”, “Перышко Финиста Ясна-Сокола”, “Белая уточка”, “Марья Моревна”; выяўленчыя матэрыялы, прысвечаныя казкам А. Пушкіна “Сказка о рыбаке и рыбке”, “Сказка о царе Салтане”, “Сказка о Золотом Петушке”; графічныя ілюстрацыі да паэмы М. Лермантава “Песня о царе Иване Васильевиче…”; эскізы дэкарацый і касцюмаў да опер рускіх кампазітараў.
Дапаўняюць экспазіцыю матэрыялы пра творчасць мастака, у тым ліку альбом “Иван Яковлевич Билибин” Т. Вярыжнікавай (2001). Цэннасць выстаўцы надаюць артыкулы і пісьмы Івана Якаўлевіча, успаміны аб ім сучаснікаў і вучняў.
Усяго на выстаўцы прадстаўлена больш за 50 дакументаў – альбомы рэпрадукцый, кнігі, паштоўкі і артыкулы.
Кантактны тэлефон: (8 017) 293 27 53.