З 15 па 25 ліпеня ў зале беларускай літаратуры (2-гі паверх, пам. 205) праходзіць юбілейная выстаўка "Маштабнасць і глыбіня", прысвечаная 80-годдзю з дня нараджэння В.А. Каваленкі, беларускага крытыка, літаратуразнаўца, празаіка.
В.А. Віктар Антонавіч Каваленка – член Саюза пісьменнікаў Беларусі з 1962 г., доктар філалагічных навук (1978), заслужаны дзеяч навукі Беларусі (1981), член-карэспандэнт АН Беларусі (1984), акадэмік НАН Беларусі. Таксама ён з’яўляецца лаўрэатам Літаратурнай прэміі Саюза пісьменнікаў СССР (1976, за кнігу "Прага духоўнасці"), лаўрэатам Дзяржаўнай прэміі Беларусі імя Я. Коласа (1980, за ўдзел у 2-томным даследаванні "Гісторыя беларускай дакастрычніцкай літаратуры" і "История белорусской советской литературы").
Творчасці В.А. Каваленкі ўласціва грамадзянская пазіцыя крытыка, якая спалучаецца з вастрынёй думкі, чалавечнасцю, фундаментальнай эрудыцыяй.
На выстаўцы экспануецца больш за 150 дакументаў, сістэматызаваных у 4 раздзелы, назвы якіх вельмі яскрава характарызуюць шматгранную творчасць Віктара Антонавіча.
У першым раздзеле "Грунтоўна, доказна, арыгінальна" прадстаўлены асобныя выданні прац В.А. Каваленкі: "Веліч праўды: выбранае" (1989), "Пошукі і здзяйсненні: творчасць Змітрака Бядулі" (1963), "Давер" (1967), "Голас чалавечнасці" (1970), "Шляхі развіцця беларускай савецкай прозы" (1972), "Вытокі. Уплывы. Паскоранасць: развіццё беларускай літаратуры ХIХ–ХХ ст." (1975), "З пазіцый сучаснасці" (1975), "Прага духоўнасці" (1975), "Праблемы сучаснай беларускай крытыкі" (1977), "Жывое аблічча дзён" (1979), "Іван Шамякін: нарыс жыцця і творчасці" (1980), "Міфа-паэтычныя матывы ў беларускай літаратуры" (1981), "Общность судеб и сердец: белорусская проза о Великой Отечественной войне в контексте русской и других литератур" (1985), "Покліч жыцця" (1987).
На выстаўцы таксама прадстаўлены раман Віктара Антонавіча "Падвышанае неба"(1978).
Працягвае экспазіцыю другі раздзел "Вышыня крытэрыяў", які ўключае вялікую колькасць работ В.А. Каваленкі, надрукаваных ў часопісах і калектыўных зборніках.
Іншыя віды дзейнасці пісьменніка прадстаўлены ў раздзеле "Майстэрства перакладчыка, рэдактара, рэцэнзента, складальніка". Пераклады В.А. Каваленкі на рускую мову прадстаўлены творамі М. Лынькова, В. Адамчыка, Я. Сіпакова, Г. Далідовіча, Ю. Мушкеціка і інш.
Раздзел "Яго вялікасць – працаўнік" уключае публікацыі пра жыццё і творчы шлях пісьменніка, змешчаныя ў энцыклапедычных выданнях, калектыўных зборніках і часопісах. Калегі, вучні і сябры Віктара Антонавіча расказваюць пра яго як пра цікавага чалавека, таленавітага, прынцыповага вучонага і педагога, вялікага працаўніка. Свае публікацыі яму прысвяцілі Дз. Бугаёў, М. Мушынскі, А. Лойка, М. Тычына, В. Бечык, М. Арочка, В. Локун, І. Ралько і інш.
Выстаўка ілюстравана фотаздымкамі пісьменніка і яго аўтографамі.
Кантактны тэлефон: 293-27-16.
