З 4 лютага па 23 сакавіка ў зале нотных і аўдыявізуальных дакументаў (пам. 305) праходзіць выстаўка “Магія песні”, прысвечаная 70-годдзю беларускага кампазітара Э.Б. Зарыцкага.
Эдуард Барысавіч нарадзіўся 9 лютага 1946 года ў г. Красны Кут Саратаўскай вобласці, у 1970 годзе скончыў Беларускую дзяржаўную кансерваторыю па класе кампазіцыі прафесара А. Багатырова. Член Беларускага саюза кампазітараў (1971), заслужаны дзеяч мастацтваў Рэспублікі Беларусь (1994), народны артыст Беларусі (1999), лаўрэат прэміі Федэрацыі прафсаюзаў Беларусі (1998), у 2006-м узнагароджаны ордэнам Францыска Скарыны.
Творчасць Эдуарда Зарыцкага прадстаўляе сабой неардынарную з’яву ў сучаснай беларускай музыцы. Гэта праявілася ў звяртанні кампазітара як да “сур’ёзнай” акадэмічнай музыкі, так і да песеннага жанру, у якім ён дасягнуў найвышэйшых вяршынь. Э. Зарыцкім напісана больш за паўтары тысячы песень на разнастайную тэматыку. Так, тэма Вялікай Айчыннай вайны знайшла адлюстраванне ў песнях “Лясныя салдаты” (1984), “Набат цішыні” (1985), “Чырвоны сцяг” (1985) і інш. Немалая колькасць песень адлюстроўвае лірычныя і рамантычныя вобразы – “Нечаканая ісціна” (1980), “Месяц малады” (1987) і інш. Захапленне песенным жанрам прывяло маэстра да тэатральнай музыкі, у якой ён выступае як кампазітар-драматург, што найбольш ярка выявілася ў мюзікле “Белыя Росы” (2004).
Сёння Э. Зарыцкі займае актыўную творчую і жыццёвую пазіцыю: дае шматлікія канцэрты ў Беларусі і за мяжой, з’яўляецца членам і старшынёй журы шматлікіх песенных фестываляў і конкурсаў.
На выстаўцы прадстаўлена вялікая калекцыя нотных выданняў твораў, напісаных майстрам як у акадэмічным кірунку (“Канцэрт для габоя і камернага аркестра” (1973), “Капрычыа для фартэпіяна і камернага аркестра” (1981)), так і ў жанры песні – “Так прыйшла да нас Перамога” (1985), “Я вярнуся” (2009), “Святло бяроз” (2005).
Экспазіцыю дапаўняюць матэрыялы пра жыццё і творчасць юбіляра, кампакт-дыскі з запісамі яго твораў у выкананні лепшых беларускіх калектываў.
Кантактны тэлефон: (8 017) 293 27 52.
 |
 |
 |
 |
 |
 |
