З 16 сакавіка па 19 красавіка ў аддзеле абслугоўвання афіцыйнымі дакументамі (пам. 207) адкрыта тэматычная выстава “Лясныя рэсурсы планеты”, прысвечаная Міжнароднаму дню лясоў.
Гэты Дзень быў абвешчаны на 67-й сесіі Генеральнай асамблеі ААН 21 снежня 2012 года (рэзалюцыя A/RES/67/200) і штогод пачынаючы з 2013-га адзначаецца 21 сакавіка.
Асноўная задача Міжнароднага дня лясоў – павысіць дасведчанасць жыхароў планеты пра значнасць лясных экасістэм, іх сапраўдны стан, асноўныя меры іх аховы, узнаўлення і аднаўлення.
Лясы жыццёва важныя для дабрабыту нашай планеты і чалавецтва. Яны ўяўляюць сабой фільтр для паветра, якім мы дыхаем, і для вады, якую мы п’ём. Яны рэгулююць наш клімат, паглынаючы трэць гадавых выкідаў парніковых газаў на планеце. Лясы з’яўляюцца асяроддзем пражывання для 80 працэнтаў усіх вядомых наземных відаў, многія з якіх знаходзяцца пад пагрозай знікнення. Сёння пад гэтай пагрозай знаходзіцца звыш 1 мільёна з 8 мільёнаў відаў раслін і жывёл, якія існуюць на планеце. Ад лясоў – у плане харчавання, жылля, энергіі, лекаў і даходаў – напрамую залежыць прыблізна 1,6 мільярда чалавек.
Аднак нягледзячы на ўсё тое, што даюць нам лясы, іх плошча працягвае скарачацца трывожнымі тэмпамі. З 1990 года свет страціў 420 мільёнаў гектараў лясоў – плошчу, якая перавышае плошчу Індыі. Абязлесенне ідзе з тэмпамі амаль 10 мільёнаў гектараў за год – у асноўным праз пашырэнне сельскай гаспадаркі.
Устойлівае кіраванне лясамі можа дапамагчы скараціць абязлесенне і дэградацыю, аднавіць ландшафты, якія дэградзіравалі, а таксама забяспечыць людзей працай і аднаўляльнымі матэрыяламі.
Арганізацыя Аб’яднаных Нацый працуе над садзейнічаннем рацыянальнаму выкарыстанню, захаванню і ўстойліваму развіццю ўсіх відаў лясоў. У кастрычніку 2000 года быў заснаваны міжурадавы орган высокага ўзроўню – Форум ААН па лясах. Яго функцыямі з’яўляюцца садзейнічанне кіраванню, захаванню і ўстойліваму развіццю лясоў, а таксама ўмацаванне адпаведных доўгатэрміновых палітычных абавязацельстваў.
Кожны год для Міжнароднага дня лясоў выбіраецца пэўная тэма. Тэма 2022 года – “Лясы і ўстойлівая вытворчасць і спажыванне”.
У Беларусі лясы з’яўляюцца адным з асноўных аднаўляльных прыродных рэсурсаў і найважнейшых нацыянальных багаццяў. Лясы і лясныя рэсурсы маюць вялікае значэнне для ўстойлівага сацыяльна-эканамічнага развіцця краіны, забеспячэння яе эканамічнай, энергетычнай, экалагічнай і харчовай бяспекі.
На выставе прадстаўлена каля 80 дакументаў на рускай і англійскай мовах. Вялікую частку экспазіцыі складаюць дакументы міжнародных арганізацый: кнігі, брашуры, мімеаграфаваныя матэрыялы ААН, перыядычныя выданні.
Экспазіцыя ўключае наступныя тэматычныя раздзелы:
- Лясныя рэсурсы планеты
- Лес і ўстойлівае развіццё
- Лясное права і лясная палітыка
- Захаванне і рацыянальнае выкарыстанне лясных рэсурсаў
- Лесазнаўства і лесаводства
- Лясы і іх ахова ў Рэспубліцы Беларусь
Выстава будзе цікавая спецыялістам у галіне лясной гаспадаркі, прыродакарыстання і аховы навакольнага асяроддзя, навуковым работнікам, аспірантам, студэнтам, а таксама ўсім, хто цікавіцца праблемай захавання лясоў і біялагічнай разнастайнасці нашай планеты.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Карысныя спасылкі
- Міжнародны дзень лясоў
- Міжнародны год лясоў
- Сайт Міжнароднага дня лясоў
- Лясная гаспадарка
- Форум Арганізацыі Аб’яднаных Нацый па лясах
- Абараняючы біяразнастайнасць, абараняючы лясы
- Міністэрства лясной гаспадаркі Рэспублікі Беларусь
- Сумеснае партнёрства па лясах
- Камітэт па лясной гаспадарцы
- Стан лясоў свету
Тэлефон для даведак: (8 017) 293 27 34.
Матэрыял пададзены аддзелам абслугоўвання афіцыйнымі дакументамі.