З 19 сакавіка па 29 красавіка ў зале дакументаў міжнародных арганізацый (2-гі паверх, пам. 207g) адкрыта тэматычная кніжная выстаўка “Лясныя рэсурсы планеты: ахова і рацыянальнае выкарыстанне”, прысвечаная Міжнароднаму дню лясоў.
Гэты Дзень быў абвешчаны Генеральнай асамблеяй Арганізацыі Аб'яднаных Нацый 21 снежня 2012 года (рэзалюцыя A/RES/67/200) і штогод адзначаецца 21 сакавіка, пачынаючы з 2013 года.
Значэнне лясоў у жыцці чалавека немагчыма пераацаніць. Лясы – крыніца драўніны, прадуктаў харчавання, паліва, валакна, корму для жывёлы і інш. Яны ўдзельнічаюць у фарміраванні клімату планеты, забяспечваюць кіслародам, перапрацоўваюць шкодныя выкіды, захоўваюць водныя рэсурсы, служаць асяроддзем пасялення раслін і жывёл, забяспечваюць ежай людзей, дапамагаюць захаваць урадлівасць глеб і ландшафты.
Сёння лясы займаюць 30 % сушы планеты Зямля, ці амаль 4 млрд га. Устойліва кіруемыя лясы – гэта здаровыя, прадукцыйныя, пругкія і аднаўляльныя экасістэмы, якія забяспечваюць неабходнымі таварамі і паслугамі людзей ва ўсім свеце. Паводле ацэнак, 1,6 млрд чалавек, ці 25 % насельніцтва зямнога шара, залежаць ад лесу як крыніцы сродкаў да існавання, які ўплывае на занятасць і атрыманне даходаў.
Аднак, нягледзячы на ўсе гэтыя неацэнныя экалагічныя, эканамічныя, сацыяльныя і медыцынскія ўласцівасці, глабальная высечка лясоў працягваецца пагрозлівымі тэмпамі – па 13 млн га лесу штогод. На долю абязлесення прыходзіцца 12–20 % ад сусветнага аб'ёму выкідаў парніковых газаў, якія спрыяюць глабальнаму пацяпленню.
ААН усяляк садзейнічаеце рацыянальнаму выкарыстанню, захаванню і ўстойліваму развіццю ўсіх відаў лясоў. У кастрычніку 2000 года быў заснаваны міжурадавы орган высокага ўзроўню – Форум ААН па лясах. Яго функцыі – садзейнічанне кіраванню, захаванню і ўстойліваму развіццю лясоў, а таксама ўмацаванне адпаведных доўгатэрміновых палітычных абавязацельстваў.
20 студзеня 2017 адбылася спецыяльная сесія Форуму ААН па лясах, на якой быў прыняты першы ў гісторыі арганізацыі Стратэгічны план па лясах на 2017–2030 гады. План адлюстроўвае падыход ААН, накіраваны на пабудову свету, у якім усе віды лясоў будуць выкарыстоўвацца рацыянальна на карысць ўстойлівага развіцця. Аснову Плана складаюць 6 глабальных мэт, сярод якіх – спыненне памяншэння плошчы ляснога покрыва; узмацненне эканамічных, сацыяльных і экалагічных пераваг лясоў; павелічэнне колькасці ахоўных лясных масіваў; мабілізацыя фінансавых рэсурсаў на лясныя мэты; паляпшэнне сістэм кіравання лясамі; пашырэнне супрацоўніцтва паміж усімі зацікаўленымі ўдзельнікамі, а таксама звязаныя з іх рэалізацыяй 26 задач. План прадугледжвае павелічэнне плошчы сусветных лясоў да 2030 года на 120 млн га, што адпавядае памерам двайной тэрыторыі Францыі.
Кожны год для Міжнароднага дня лясоў выбіраецца пэўная тэма. Тэма Дня 2019 года – “Вучыся любіць лес”.
У Рэспубліцы Беларусь лес – адзін з асноўных аднаўляльных прыродных рэсурсаў і найважнейшае нацыянальнае багацце. Лясы і лясныя рэсурсы маюць вялікае значэнне для ўстойлівага сацыяльна-эканамічнага развіцця краіны, забеспячэння яе эканамічнай, энергетычнай, экалагічнай і харчовай бяспекі. Па шэрагу ключавых паказчыкаў, якія характарызуюць лясны фонд, Беларусь уваходзіць у першую дзясятку лясных дзяржаў Еўропы.
На выстаўцы прадстаўлена больш за 80 дакументаў на рускай і англійскай мовах. Большую частку экспазіцыі складаюць дакументы міжнародных арганізацый: кнігі, брашуры, мімеаграфаваныя матэрыялы ААН, перыядычныя выданні.
Экспазіцыя ўключае наступныя тэматычныя раздзелы:
- Лясы і ўстойлівае развіццё
- Міжнародныя прававыя дакументы па захаванні і рацыянальным выкарыстанні лясных рэсурсаў
- Міжнароднае і рэгіянальнае супрацоўніцтва ў галіне захавання ўсіх відаў лясоў
- Лясы і іх ахова ў Рэспубліцы Беларусь
Выстаўка будзе цікавая спецыялістам у галіне лясной гаспадаркі, прыродакарыстання і аховы навакольнага асяроддзя, навуковым работнікам, аспірантам, студэнтам, а таксама ўсім, хто цікавіцца праблемай захавання лясоў і біялагічнай разнастайнасці нашай планеты.
Карысныя спасылкі
- Міжнародны дзень лясоў
- Міжнародны год лясоў
- Харчовая і сельскагаспадарчая арганізацыя Аб'яднаных Нацый (ФАО)
- Сайт Дня
- Лясная гаспадарка
- Дэпартамент лясной гаспадаркі
- Эканамічны і сацыяльны савет (ЭКАСАС)
- Форум Арганізацыі Аб'яднаных Нацый па лясах
- Арганізацыя Аб'яднаных Нацый па пытаннях адукацыі, навукі і культуры (ЮНЕСКА)
- Абараняючы біяразнастайнасць, абараняючы лясы
- Міністэрства лясной гаспадаркі Рэспублікі Беларусь
Дакументы і публікацыі
- Даклады Міжурадавага форуму па лясах
- Даклады Спецыяльнай міжурадавай групы па лясах
- Стан лясоў свету
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 34.
Матэрыял прадастаўлены аддзелам абслугоўвання афіцыйнымі дакументамі.