З 2 па 12 мая 2009 года ў зале беларускай літаратуры (пам. 205) праходзіць юбілейная выстаўка "Літаратурныя дыялогі", прысвечаная 75-годдзю з дня нараджэння беларускага крытыка Аляксея Кузьміча Гардзіцкага (1934–1999).
Дыялог – гэта тая жывая і ёмістая форма, якой карыстаўся пісьменнік у сваёй шматграннай творчасці. Яго гутаркі з вядучымі майстрамі слова дазвалялі лаканічна і натуральна развіваць думку, асвятляць многія актуальныя праблемы пісьменніцкай дзейнасці.
У сваіх літаратурных працах, шырока прадстаўленых на выстаўцы, А.К. Гардзіцкі ўздымае шмат розных пытанняў пра Беларусь і стаўленне да яе іншых народаў, пра беларускую літаратуру і яе месца ў свеце. Аўтар дасканала даследуе прыроду мастацкай дэталі, разглядае яе ролю ў фарміраванні вобразнай тканіны твора.
Экспазіцыя складаецца з трох раздзелаў і змяшчае каля 100 дакументаў.
У першым раздзеле "Адзіны клопат – літаратура" прадстаўлены асобныя выданні прац А.К. Гардзіцкага: "Дыялогі" (1968), "Пра майстэрства дэталі" (1969), "Творчасць Івана Шамякіна" (1971), "Сустрэчы" (1972), "Зразумець як сваё" (1977), "Вачыма сяброў: гутаркі пра ўзаемасувязь літаратур" (1977), "Сябрына" (1986), "Гутаркі: інтэрв`ю, дыялогі пра літаратуру" (1988). Шмат выданняў захавалася з аўтографам аўтара.
Працягвае экспазіцыю другі раздзел "Цяпло чалавечых сустрэч", які ўключае публікацыі прац А. К. Гардзіцкага, змешчаныя ў часопісах і калектыўных зборніках. У іх аўтар вядзе дыялогі пра праблемы сучаснай літаратуры, пра таямніцы майстэрства з вядомымі беларускімі і замежнымі літаратарамі. Яго субяседнікамі былі В. Быкаў, А. Вярцінскі, Я. Семяжон, І. Мележ, І. Шамякін, І. Навуменка, К. Буйло і іншыя беларускія пісьменнікі, а таксама Р. Казакова, В. Астаф’еў, Р. Лубкіўскі, Э. Матузявічус, Ю. Ванаг, Г. Эмін, К. Яшэн, Х. Гулям і інш.
Экспазіцыя знаёміць з перакладчыцкай і рэдактарскай дзейнасцю даследчыка. Шырока прадстаўлены выданні літаратурнага зборніка "Далягляды", укладальнікам якога А.К. Гардзіцкі з`яўляўся шмат гадоў, складзеныя ім даведнікі "Пісьменнікі Савецкай Беларусі" (1981), "Беларускія пісьменнікі (1917–1990)" (1994), зборнік "Беларускія савецкія паэты" (1978), які быў выдадзены ў Тбілісі ў серыі "Паэзія братніх рэспублік" на грузінскай мове, зборнік "Братэрства" і шмат іншых выданняў.
Завяршае экспазіцыю раздзел "Літаратура. Пісьменнік. Час.", у якім прадстаўлены публікацыі пра жыццёвы і творчы шлях пісьменніка. У энцыклапедычных выданнях, часопісах і зборніках змешчаны артыкулы калег і сяброў А.К. Гардзіцкага. Аўтарамі публікацый з’яўляюцца В. Рагойша, Г. Шупенька, З. Гальмакоў, А. Гурская, А. Майсейчык, У. Содаль і інш.
Выстаўка ілюстравана фотаздымкамі пісьменніка.
Кантактны тэлефон: 293-27-16.
 |
 |
 |
 |
