З 22 чэрвеня па 9 ліпеня 2009 года ў зале беларускай літаратуры (пам. 205) праходзіць кніжная выстаўка “Лірык крытыкі”, прысвечаная 70-годдзю з дня нараджэння вядомага беларускага літаратуразнаўца, крытыка Варлена Леанідавіча Бечыка (1939–1985).
У гісторыю беларускага літаратуразнаўства В.Л. Бечыкам упісана адметная старонка. Яго працы як даследчыка беларускага мастацкага слова, перш за ўсё паэтычнага, застануцца аднымі з бліскучых за ўвесь пасляваенны час.
Кніжная экспазіцыя складаецца з трох раздзелаў. У першым – “Радкі жыцця” –прадстаўлены даведачныя выданні, якія змяшчаюць біяграфічныя звесткі пра В.Л. Бечыка. Асаблівай увагі заслугоўваюць дзённікі, якія Варлен Леанідавіч пачаў весці з 20-гадовага ўзросту і працягваў да канца свайго, на жаль, вельмі кароткага жыцця. Да публікацыі дзённікавыя запісы былі падрыхтаваны Л. Кароткай, маці В. Бечыка. Іх часопісны варыянт і асобнае кніжнае выданне “Радкі і жыццё” выйшлі ўжо пасля заўчаснай смерці аўтара.
Самы разгорнуты раздзел – “Далягляды і абсягі крытыка” – уключае кніжныя выданні даследчых прац В.Л. Бечыка, кнігі, да якіх ім былі напісаны ўступныя артыкулы, а таксама шматлікія літаратурныя рэцэнзіі.
У раздзеле “У вянок памяці” прадстаўлены ўспаміны пра В.Л. Бечыка, паэтычныя прысвячэнні яго памяці.
Кантактны тэлефон: 293-27-16.
