З 1 чэрвеня па 20 жніўня на 2-м паверсе кальцавога калідора бібліятэкі працуе выстаўка “Лета з добрай кнігай”, прымеркаваная да Міжнароднага дня абароны дзяцей (1 чэрвеня) і пачатку летніх канікул.
Лета – час вялікіх канікул, цікавых назіранняў, вясёлых сустрэч і карыснага адпачынку. Усім бацькам хочацца, каб іх дзеці былі цікаўнымі і імкнуліся да ведаў, дасягнулі поспеху ў жыцці. Адным з лепшых сродкаў інтэлектуальнага развіцця ва ўсе часы з’яўляліся кнігі.
Чытаючы кнігу, дзіця ўяўляе вобразы і малюнкі таго, што адбываецца ў сюжэце. Дзякуючы гэтаму яно не толькі атрымлівае задавальненне ад чытання, але і трэніруе, развівае здольнасці свайго мозгу. Чытанне дастаўляе эстэтычнае задавальненне, а таксама з’яўляецца найважнейшай часткай культурнага і духоўнага самаўдасканалення.
Прадстаўленыя на выстаўцы літаратурна-мастацкія творы выдадзены на роднай мове і ілюстраваны надзвычай таленавітымі мастакамі. Ілюстрацыі, узбагачаючы ўражанні чытача, напаўняюць яго эстэтычнымі перажываннямі, з ранняга ўзросту закладваюць асновы добрага мастацкага густу.
У раздзел “На далонях вечнасці” ўвайшлі кнігі, прысвечаныя славутай гісторыі і выбітным асобам Беларусі. На старонках гэтых кніг цікава апавядаецца пра найбольш яркія і значныя падзеі, з’явы, помнікі культуры і гісторыі, па якіх пазнаюць і прызнаюць беларусаў, адрозніваюць нашу краіну ад іншых.
Беларусь багатая на чароўную і дзіўную прыроду. Кніжкі з казкамі, легендамі, апавяданнямі, вершамі пра лясы, рэкі, азёры, раслінны і жывёльны свет нашай краіны сабраны ў раздзеле “Скарбы прыроды”. Прырода ў іх нібы ажывае і набывае здольнасць тварыць цуды.
Розным цудам, казачным гісторыям і дзіцячым фантазіям знайшлося месца на паліцы з назвай “Завітала ў госці казка”.
Свет дзіцячай душы не ведае меж. У раздзеле “Суседскія гісторыі” сабраны кнігі сучасных шведскіх аўтараў. Шведскія дзіцячыя пісьменнікі з неверагоднай павагай да асобы малога чалавека апавядаюць пра свет яго захапленняў, мар, прыдумак і гульняў. Для добрых бацькоў у гэтым свеце няма дробязей. Такія бацькі становяцца дзецям найлепшымі дарадцамі і сябрамі.
Апошні раздзел выстаўкі “У пошуках прыгод і таямніц” больш арыентаваны на падлеткаў і запрашае ў захапляльныя і фантастычныя вандроўкі па розных гістарычных часах і прасторах, а таксама па трывожным і зваблівым свеце пачуццяў і складаных лабірынтах чалавечых адносін.
Кнігі адрасаваны дзецям, але стануць карысным чытаннем і для дарослых.
Кантактны тэлефон: (8 017) 293 29 80.