Штогод пачынаючы з 1960-га вынікі працы беларускіх выдаўцоў традыцыйна падводзяцца на конкурсе “Мастацтва кнігі”. Яго заснавальнікам выступае Міністэрства інфармацыі Рэспублікі Беларусь. Мэта – развіццё мастацтва беларускай кнігі, павышэнне яе канкурэнтаздольнасці, мастацкай і паліграфічнай культуры. Гэта своеасаблівая творчая справаздача выдаўцоў, мастакоў, паліграфістаў, якія стварылі лепшыя ўзоры друкаванай прадукцыі за мінулы год.
Удзел у LXII Нацыянальным конкурсе “Мастацтва кнігі” ўзялі 30 выдавецтваў рознай формы ўласнасці. Было пададзена 150 выданняў. Галоўнай намінацыяй конкурсу па традыцыі была “Трыумф”. Акрамя гэтага, пераможцы былі вызначаны ў тэматычных намінацыях: “ЛІТ-фармат”, “Падручнік новага стагоддзя”, “Фотапогляд”, “Разам з кнігай мы расцём”, “Залатыя скрыжалі”, “АРТ-кніга”, “Навука і веды”, “Духоўнасць”; спецыяльных намінацыях: “Садружнасць”, “У люстэрку часу”, “Праўда памяці”, “Беларусь памятае” і персанальнай – “Майстэрства”.
Вышэйшую ўзнагароду конкурсу ў намінацыі “Трыумф” атрымала выдавецтва “Беларусь” за кнігу “Геноцид белорусского народа. Лагеря смерти: информационно-аналитические материалы и документы”, якая выйшла пад агульнай рэдакцыяй доктара юрыдычных навук Андрэя Шведа. Выданне ўдастоена памятнага знака-сімвала “Вялікі залаты фаліянт” і дыплома імя Францыска Скарыны. Пераможцы ўсіх астатніх намінацый былі ўзнагароджаны памятным знакам-сімвалам “Малы залаты фаліянт” і спецыяльнымі дыпломамі. Сярод фаварытаў – выдавецтва “Беларусь”, на рахунку якога перамога ў 11 намінацыях. У тым ліку – дыплом I ступені ў намінацыі “Арт-кніга” за альбомнае выданне, прысвечанае векавому юбілею Нацыянальнай бібліятэкі Беларусі.
Лепшым ілюстратарам прызнана Лілія Бусарава за ілюстрацыі да кнігі Эдзі Агняцвет “Мой рыжы Бім”, лепшым фотамастаком – Анатоль Дрыбас за кнігі “Нацыянальная бібліятэка. 100 гадоў” і “Беларуская кухня”.
Нацыянальная бібліятэка Беларусі шчыра віншуе пераможцаў і прызёраў нацыянальнай прэміі “Мастацтва кнігі” і запрашае ўсіх жадаючых азнаёміцца з лепшымі выданнямі Беларусі 2022 года.
Выстава працуе з 28 сакавіка па 8 лістапада 2023 года ў кальцавой галерэі 3-га паверха.
Дата яе заканчэння можа быць зменена.
Час работы выставы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 29 80.
Матэрыял пададзены аддзелам галерэйна-выставачнай дзейнасці.
