З 7 сакавіка па 1 красавіка ў зале выяўленчых і відэадакументаў (пам. 307) праходзіць выстаўка “Кветак таямнічая сіла: кветкі ў выяўленчым мастацтве”.

Кветкі ў жывапісе – гэта яркі і прывабны калейдаскоп фарбаў і адценняў. Багаты і выразны раслінны свет з яго спалучэннямі мудрагелістых форм і маляўнічай палітрай здаўна знаходзіць адлюстраванне ў жывапісе, натхняючы мастакоў на стварэнне шэдэўраў, дзе кветкі – галоўныя дзеючыя “асобы”.

Пышныя, раскошныя букеты садовых кветак, змешчаныя ў каштоўныя вазы, або кампазіцыі са сціплых палявых кветачак з садавіной нязменна дораць радасць, захапляюць гармоніяй форм і зместу, нясуць пазітыў.

На выстаўцы экспануюцца рэпрадукцыі работ знакамітых мастакоў. Сярод іх – К. Каровін “Ружы”, І. Хруцкі “Кветкі і плады”, А. Рэнуар “Вялікая ваза з кветкамі”, К. Манэ “Жанчыны ў садзе” і інш.

З 7 сакавіка да ўвагі карыстальнікаў таксама прадстаўлена віртуальная выстаўка "Кветак таямнічая сіла", падрыхтаваная спецыялістамі Нацыянальнай бібліятэкі Беларусі.

Усяго ў экспазіцыі прадстаўлена каля 150 дакументаў: паштоўкі, рэпрадукцыі, календары, альбомы, кнігі, часопісы.

Запрашаем усіх атрымаць асалоду ад гэтага кветкавага свята.

Кантактны тэлефон: (8 017) 293 27 53.