З 17 мая па 14 чэрвеня ў зале дакументаў міжнародных арганізацый (пам. 207g) адкрыта тэматычная выстава “Курэнне або здароўе – вам выбіраць!”, прысвечаная Сусветнаму дню без тытуню.
Гэты Дзень быў абвешчаны 17 мая 1989 года Сусветнай арганізацыяй аховы здароўя (СААЗ) на 42-й сесіі Сусветнай асамблеі аховы здароўя (рэзалюцыя WHA42.19) і штогод адзначаецца 31 мая.
У 2023 годзе Сусветны дзень без тытуню праходзіць пад дэвізам “Вырошчваць прадукты харчавання, а не тытунь”.
Прапанаваная чытачам выстава налічвае каля 80 дакументаў на рускай і англійскай мовах: кнігі, перыядычныя выданні, брашуры, буклеты. Гэтыя дакументы раскрываюць шматгранную дзейнасць Сусветнай арганізацыі здароўя і іншых арганізацый, накіраваную на прыцягненне глабальнай увагі да тытунёвай эпідэміі і яе смяротных наступстваў.
Прадстаўленая экспазіцыя пазнаёміць чытача з праблемай тытунёвай залежнасці і яе наступствамі, а таксама з тымі мерамі, якія прымаюцца на міжнародным і нацыянальным узроўнях для зніжэння ўзроўню спажывання тытуню.
Сярод прадстаўленых на выставе дакументаў – матэрыялы навукова-практычных канферэнцый, манаграфіі, вучэбна-метадычныя дапаможнікі па прафілактыцы тытунекурэння, інфармацыйныя матэрыялы па збавенні ад нікацінавай залежнасці і інш.
Экспазіцыя ўключае наступныя тэматычныя раздзелы:
- Здаровы лад жыцця: прафілактыка тытунезалежнасці
- Псіхалагічныя аспекты нікацінавай залежнасці
- Курэнне і яго ўплыў на здароўе
- Жыццё без тытуню: як кінуць паліць
Выстава будзе карысная спецыялістам у галіне аховы здароўя, сацыяльным і медыцынскім работнікам, педагогам, студэнтам вышэйшых навучальных устаноў, а таксама ўсім, хто цікавіцца праблемай тытунезалежнасці і пытаннямі здаровага ладу жыцця.
Тытунёвая эпідэмія з’яўляецца адной з найбольш сур’ёзных пагроз для здароўя насельніцтва, якія калі-небудзь узнікалі ў свеце: штогод ад яе гіне больш за 8 млн чалавек, уключаючы 1,2 млн людзей, якія паміраюць ад наступстваў уздзеяння другаснага тытунёвага дыму.
У адказ на глабалізацыю “тытунёвай эпідэміі” была распрацавана Рамачная канвенцыя СААЗ па барацьбе з тытунём (РКБТ СААЗ), якая прынята Сусветнай асамблеяй аховы здароўя 21 мая 2003 года і ўступіла ў сілу 27 лютага 2005 года. У шасці стратэгіях канвенцыі прапанаваны асноўныя крокі, якія варта распачаць дзяржавам у барацьбе з тытунекурэннем. Гэта забарона прамой і ўскоснай рэкламы тытуню; павышэнне падаткаў і цэн на тытунь; стварэнне ва ўсіх грамадскіх і працоўных памяшканнях свабоднага ад тытунёвага дыму асяроддзя; размяшчэнне буйных і выразных графічных папярэджанняў аб небяспецы для здароўя на ўпакоўках тытунёвых вырабаў; арганізацыя дапамогі тым, хто хоча адмовіцца ад шкоднай звычкі.
Беларусь падпісала канвенцыю 17 чэрвеня 2004 года, а ратыфікавала 8 верасня 2005 года. Тым самым наша дзяржава ўзяла на сябе абавязацельства прымаць усе яе ўмовы на нацыянальным, рэгіянальным і міжнародным узроўнях, каб пастаянна і істотна скарачаць спажыванне тытуню. У краіне забаронена рэклама тытунёвых вырабаў, у адпаведнасці з патрабаваннямі РКБТ СААЗ зменены патрабаванні да іх упакоўкі, праводзіцца работа па стварэнні тэрыторый, свабодных ад курэння, забаронена курэнне ў шэрагу грамадскіх месцаў.
Карысныя спасылкі
- WHA56.1: Рамачная канвенцыя СААЗ па барацьбе супраць тытуню
- Дзейнасць СААЗ па барацьбе супраць тытуню
- Сусветны дзень без тытуню – 2023 “Вырошчваць прадукты харчавання, а не тытунь”
- Тытунь: інфармацыйны бюлетэнь
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 34.
Матэрыял пададзены аддзелам абслугоўвання афіцыйнымі дакументамі.