З 4 кастрычніка па 10 снежня ў Нацыянальнай бібліятэцы Беларусі (2-гі паверх, кальцавы калідор) ладзіцца выстаўка “Культура Беларусі: традыцыі і перспектывы”, прымеркаваная да Дня работнікаў культуры (14 кастрычніка).
Беларуская культура захавала сваю адметнасць і належыць да агульнаеўрапейскай культурнай спадчыны і сучаснай сусветнай культуры. Развіццё культуры сёння з'яўляецца адным з прыярытэтаў дзяржаўнай палітыкі. Культура з'яўляецца душой, гордасцю і славай беларускага народа, яна аб'ядноўвае і ўзвышае нацыю, застаецца адвечнай каштоўнасцю чалавецтва.
У экспазіцыі, прапанаванай Нацыянальнай бібліятэкай Беларусі, прадстаўлена каля 200 дакументаў за апошнія 5 гадоў, сярод якіх: даведачныя і энцыклапедычныя выданні, вучэбныя дапаможнікі, манаграфіі, зборнікі артыкулаў, альбомы, буклеты па гісторыі і сучасным стане культуры нашай краіны.
Асобны раздзел выстаўкі – “Нясвіж – культурная сталіца Беларусі 2012 года” – прысвечаны цудоўнаму старажытнаму гораду, які стаў трэцім (пасля Полацка і Гомеля) горадам, які атрымаў ганаровы статус культурнай сталіцы Беларусі. Галоўнай падзеяй праекта “Культурныя сталіцы” ў 2012 г. стала афіцыйнае адкрыццё пасля рэстаўрацыі Палацавага ансамбля Радзівілаў. Таксама на працягу года ў Нясвіжы былі прадстаўлены лепшыя творчыя праекты: тэатральны форум прафесійных тэатраў “Тэатр Уршулі Радзівіл”, выстаўкі эксклюзіўных старадрукаваных радзівілаўскіх выданняў XVI–XVIII стст., старажытных карт Беларусі, калекцый гістарычнага касцюма.
Яркімі падзеямі ў культурным жыцці Нясвіжа сталі канцэрты беларускай старадаўняй музыкі палацаў і сядзіб, вечары Вялікага тэатра, шляхецкі баль і Ноч музеяў у Нясвіжскім палацы Радзівілаў, XVII Свята мастацтваў “Музы Нясвіжа”, фестываль сярэднявечнай культуры “Рыцары Вялікага Княства ў старадаўнім Нясвіжы”, прэзентацыя музычнага праекта “Залатая калекцыя беларускай песні”.
Кантактны тэлефон: (8 017) 293 28 86.
