З 16 лютага па 25 сакавіка ў зале беларускай літаратуры (пам. 205) праходзіць выстаўка “Крэўную сувязь са светам адчуў”, прысвечаная 60-годдзю з дня нараджэння беларускага паэта Алеся Пісьмянкова.
За свой кароткі век (1957–2004) Аляксандр Уладзіміравіч Пісьмянкоў пакінуў вялікі след у літаратуры і трывала замацаваўся ў яе гісторыі. Прайшоў шлях ад простага карэспандэнта да галоўнага рэдактара штотыднёвіка “Літаратура і мастацтва”, працаваў у рэдакцыях часопісаў “Полымя” і “Вожык”. У яго творах – асэнсаванне гістарычнага мінулага беларускага народа, паэтызацыя роднай зямлі, тэма кахання. Пасля смерці Пісьмянкова застаўся шэраг таленавітых твораў, якія працягваюць недажытае паэтам жыццё.
Літаратурная спадчына Алеся Пісьмянкова прадстаўлена на выстаўцы нарысамі, эсэ, вершамі, творамі для дзяцей. На экспазіцыйных паліцах – паэтычныя зборнікі “Белы камень” (1983), “Чытаю зоры” (1988), “Вершы” (1997), “Журавель над студняй” (1998), вершы і казкі для дзяцей “Мы з братам” (2003), кнігі выбраных твораў “Я не памру, пакуль люблю” (2000) і “Не знікай” (2012) і інш.
Даведацца пра жыццё А. Пісьмянкова і яго творчасць дапамогуць манаграфіі, літаратурна-крытычныя публікацыі ў энцыклапедычных і перыядычных выданнях, а таксама ўспаміны сяброў. Зацікавіць наведвальнікаў кніга А. Зэкава “Алесь” (2007), у якой сабраны вершы пра юбіляра, жарты і сяброўскія пародыі.
Асобным раздзелам выдзелены пераклады твораў пісьменніка.
Усяго экспазіцыя налічвае каля 70 выданняў.
Кантактны тэлефон: (8 017) 293 27 16.