З 23 сакавіка па 11 чэрвеня ў зале нотных і аўдыядакументаў (пам. 305) арганізавана выстаўка “Класічных традыцый прыгажосць”, прысвечаная 280-годдзю з дня нараджэння Франца Ёзэфа Гайдна (1732–1809).
Вялікі аўстрыйскі кампазітар, дырыжор, адзін з заснавальнікаў венскай класічнай школы Ф. Гайдн прайшоў доўгі і складаны творчы шлях, пакінуўшы сапраўды велізарную спадчыну, якая складаецца з твораў практычна ўсіх існаваўшых у той час музычных жанраў. Ім створана больш за 100 сімфоній, струнныя квартэты, санаты для фартэпіяна, оперы, імшы, кантаты, канцэрты, камерныя ансамблі...
Сярод найбольш вядомых твораў – “Развітальная сімфонія” (1772), дванаццаць “Лонданскіх сімфоній” (1791–1795), напісаных пад час трыўмфальнай паездкі ў Англію. Годна ўвянчалі творчы шлях кампазітара араторыі “Стварэнне свету” (1798) і “Поры года” (1801). Кампазітар з’яўляецца аўтарам музыкі, якая стала нацыянальным гімнам Аўстрыі, а пазней – Германіі.
На выстаўцы прадстаўлены нотныя зборнікі шматлікіх твораў Ф. Ё. Гайдна, сярод якіх рэдкія выданні XIX ст., а таксама аўдыядакументы з фондаў Нацыянальнай бібліятэкі. Дапаўняюць экспазіцыю кнігі і публікацыі з перыядычных выданняў пра кампазітара і яго творчасць.
Кантактны тэлефон: 293-27-52.
 |
 |
 |
 |
 |
 |
 |
 |
 |
 |
 |
 |
