З 21 сакавіка па 10 красавіка ў Нацыянальнай бібліятэцы Беларусі (2-гі паверх, кальцавы калідор) ладзіцца кніжная выстаўка "Пышнасць італьянскага мастацтва ў выданнях бібліятэкі Франка Марыя Рычы”.
Напярэдадні святкавання 150-годдзя аб’яднання італьянскіх зямель Пасольства Італіі ў Рэспубліцы Беларусь дало наведвальнікам Нацыянальнай бібліятэкі Беларусі ўнікальную магчымасць убачыць частку калекцыі кніг і часопісаў аднаго з самых прэстыжных выдавецтваў у свеце.
Франка Марыя Рычы, арыстакрат і бліскучы графічны дызайнер, у 1963 годзе ў родным горадзе Парма заснаваў выдавецкі дом, які носіць яго імя.
Фаліянты выдавецтва “Franco Maria Ricci” (“FMR”) характарызуюцца выключнай якасцю і майстэрствам вырабу, выкарыстаннем таніраванай паперы ручной вытворчасці, асобнымі ўклейкамі фатаграфій і рэпрадукцый твораў мастацтва, карт, чарцяжоў, схем.
Тэксты, напісаныя мастацтвазнаўцамі з сусветнымі імёнамі, адрозніваюцца прыгажосцю, выразнасцю і ўраўнаважанасцю набору, дасягнутага ідэальнымі суадносінамі шрыфта Вodoni і шчодра выкарыстоўваемай белай прасторы. Гэты прыём сеньёр Рычы ўзяў ад распрацоўшчыка 400 відаў шрыфтоў і кіраўніка Каралеўскай друкарні ў Парме ў 18 – пачатку 19 стагоддзя Джамбатыста Бадоні.
Франка Марыя Рычы аддаў даніну павагі свайму геніяльнаму суайчынніку, абраўшы для першага выдання “FMR” выпуск рэпрынта “Manuale tipografico” Джамбатыста Бадоні. Яму ж сеньёр Рычы абавязаны выкарыстаннем некаторых элементаў у афармленні сваіх стыльных вокладак з чорнага шоўку.
На выстаўцы прадстаўлена больш за 70 твораў друку выдавецтва “Franco Maria Ricci”, сярод якіх энцыклапедычныя выданні па мастацтве “ART FMR” з дзівоснай паліграфіяй, альбомы, прысвечаныя мастацкай калекцыі Нацыянальнай галерэі горада Пармы. Пышныя віды старадаўняй Фларэнцыі ў выкананні італьянскага мастака Фабіа Барбатоні сабраны ў кнізе “Florence lost”. Убранню знакамітага на ўвесь свет опернага тэатра Мілана прысвечаны альбом “La Scala”. Годнае месца сярод кніжных выданняў займае часопіс па мастацтве “FMR”, які выдаецца з 1982 г. 6 раз у год на італьянскай, англійскай, французскай і іспанскай мовах. Гэты часопіс заслужана прызнаны мастацтвазнаўцамі самым прыгожым часопісам у свеце.
Жамчужынай экспазіцыі па праве можна назваць пышна ілюстраванае 30-томнае гісторыка-біяграфічнае выданне “ANTICHI STATI”, якое з’яўляецца дасканалым творам друкарскага мастацтва, узорам стылю і бездакорнага густу.
Стыль класічнай элегантнасці выдавецкага дома “Franco Maria Ricci” і вельмі абмежаваныя тыражы яго прадукцыі надаюць дадатковую каштоўнасць друкаваным творам і выклікаюць вялікую цікавасць у бібліяфілаў і калекцыянераў ва ўсім свеце.
Кантактны тэлефон: 293-28-86.
 |
 |
 |
|||
 |
 |
 |
