З 29 лістапада па 31 снежня ў зале беларускай літаратуры (пам. 205) праходзіць юбілейная выстаўка “Хадзі на мой голас”, прысвечаная 80-годдзю беларускай паэтэсы і грамадскага дзеяча Дануты Бічэль-Загнетавай.
Паэтэсе, лаўрэату Дзяржаўнай прэміі Беларусі імя Янкі Купалы (1984) Дануце Бічэль-Загнетавай быў дараваны непаўторны паэтычны голас. У ім жывуць імклівы Нёман і старажытная Гародня, сівая Каложа і бацькоўская хата. Ён памятае дух беларускай даўніны, міфаў, абрадаў, песень. Гэта ўсёдаравальны голас маці, апякункі і захавальніцы роднай зямлі, традыцый, мовы.
Паэзія Дануты Бічэль-Загнетавай – гэта суцяшэнне для кожнае душы, якая шукае адказы на вечныя і таямнічыя пытанні, шукае выйсце з разладу да гармоніі, шукае шлях да Святла.
Выстаўку адкрываюць уласныя творы пісьменніцы, якія складаюць раздзел “Паэтычны ружанец”. Сярод прадстаўленых выданняў – зборнікі паэзіі “Дзявочае сэрца”, “Доля”, “Ты – гэта ты”, “Дзе ходзяць басанож”, “А на Палессі”, “Ты не самотны…”, “На белых аблоках сноў” і іншыя, а таксама кнігі літаратурных партрэтаў і эсэ “Хадзі на мой голас” і ”Мост святога Францішка”. Ёсць у творчай спадчыне пісьменніцы і кнігі для дзяцей – зборнікі паэзіі “Перапёлка”, “Грыб-парасон”, “Дзічка”, “Дагані на кані” і інш. Дапаўняюць раздзел літаратуразнаўчыя артыкулы з часопіса “Наша вера” за розныя гады.
Другая частка экспазіцыі “Служэнне праўдзе і любові” складаецца з перакладаў, зробленых Данутай Іванаўнай., у ліку якіх – выбраная паэзія ксяндза Яна Твардоўскага і Папы Рымскага Яна Паўла ІІ, а таксама перакладаў твораў паэтэсы на мовы свету – рускую, польскую, англійскую і інш.
З асаблівасцямі жыццёвага і творчага шляху юбіляра можна пазнаёміцца ў трэцім раздзеле выстаўкі – “Душу раскрыўшы насцеж”, які змяшчае асобныя артыкулы з часопісаў і зборнікаў па тэме.
Выстаўка налічвае каля 80 дакументаў.
Тэлефон для даведак: (8 017) 293 27 16.
 |
 |
 |
 |
 |
 |
