З 17 ліпеня па 6 жніўня ў зале дакументаў міжнародных арганізацый (пам. 207g) адкрыта тэматычная кніжная выстаўка “Каштоўнасць, якая не ведае межаў”, прысвечаная Міжнароднаму дню дружбы.
Гэты Дзень – адно з самых маладых свят у календары ААН. Рашэнне аб яго правядзенні Генеральная Асамблея ААН прыняла 27 красавіка 2011 года на сваёй 65-й сесіі (рэзалюцыя 65/275). Ідэалагічнай асновай для новай даты сталі Дэкларацыя і праграма дзеянняў у галіне культуры міру і Міжнароднага дзесяцігоддзя культуры міру і ненасілля ў інтарэсах усёй планеты. Асамблея пастанавіла адзначаць штогод Міжнародны дзень дружбы 30 ліпеня, зазначыўшы, што сяброўства паміж народамі, краінамі, культурамі і асобнымі персонамі можа натхніць на намаганні па забеспячэнні міру і дае магчымасць навесці масты паміж грамадствамі, якія паважаюць культурную разнастайнасць.
Генеральная Асамблея заклікала дзяржавы, міжнародныя арганізацыі і групы грамадскай супольнасці, адзначаючы Міжнародны дзень дружбы, арганізоўваць мерапрыемствы і ініцыятывы, накіраваныя на падтрымку дыялогу паміж цывілізацыямі, салідарнасці, узаемаразумення і прымірэння.
У рэзалюцыі таксама падкрэсліваецца важнасць заахвочвання моладзі як будучых лідараў да грамадскай дзейнасці, якая садзейнічае дыялогу культур і павазе разнастайнасці.
Сяброўства, гармонія, памяркоўнасць, узаемная павага і клопат – гэтыя канцэпцыі ляжаць у аснове ўсёй дзейнасці Арганізацыі Аб’яднаных Нацый і яе падраздзяленняў. Статут ААН абвяшчае, што адной з мэт Арганізацыі з’яўляецца развіццё “дружалюбных адносін паміж нацыямі”. Тыя ж самыя словы напісаны ў прэамбуле да Усеагульнай дэкларацыі праў чалавека. У Статуце ЮНЕСКА гаворыцца пра неабходнасць ўсталявання міру, заснаванага не толькі на “эканамічных і палітычных пагадненнях урадаў”, але і на “інтэлектуальнай і маральнай салідарнасці чалавецтва”. Ініцыятыва Альянсу цывілізацый ААН таксама накіравана на ўмацаванне супрацоўніцтва і ўзаемаразумення паміж дзяржавамі і народамі розных культур і рэлігій, у тым ліку для барацьбы супраць сіл, якія распальваюць экстрэмізм.
Святкаванне Міжнароднага дня дружбы, па меркаванні ААН, павінна праводзіцца з улікам асаблівасцей культуры, традыцый і звычаяў розных краін. Калі мы сябруем адзін з адным, мы напрамую знаёмімся з разнастайнасцю навакольнага свету і рознымі пунктамі гледжання. Сяброўства дорыць радасць і дапамагае ў цяжкую хвіліну, хоць нават самыя трывалыя адносіны могуць падвяргацца выпрабаванням. Тыя ж прынцыпы, на якіх будуюць адносіны самыя лепшыя сябры – давер, павага і ўзаемавыгадныя рашэнні, – адыгрываюць таксама важную ролю ў супольнасці дзяржаў. Сяброўства паміж народамі, краінамі і культурамі – гэта аснова для забеспячэння міру, стабільнасці і згоды паміж імі. Таму вельмі актуальна ў наш час гучаць словы прэзідэнта Злучаных Штатаў Вудра Вільсана, які сказаў: “Сяброўства – гэта адзінае, што можа калі-небудзь аб’яднаць увесь свет”.
Экспазіцыя ўключае наступныя тэматычныя раздзелы:
- Дружба народаў: разам да адзінай мэты;
- Дружба – адзін з галоўных маральных законаў сучаснасці;
- Дыялог паміж цывілізацыямі – талерантнасць у рашэнні палітычных і сацыяльных канфліктаў;
- Культура міру;
- Выхаванне ў духу памяркоўнасці;
- Дыялог паміж культурамі.
Прапанаваная чытачам выстаўка налічвае каля 50 дакументаў. У асноўным, гэта дакументы міжнародных арганізацый (ААН, ЮНЕСКА, Еўрапейскага саюза і інш.) на рускай, англійскай і нямецкай мовах: кнігі, перыядычныя выданні, мімеаграфаваныя матэрыялы ААН (мастхед), брашуры, буклеты.
Выстаўка будзе карыснай шырокаму кругу чытачоў, якія цікавяцца культурай міру, культурнай разнастайнасцю, праблемамі сучасных міжканфесійных адносін, пытаннямі талерантнасці, а таксама спецыялістам у галіне сусветнай палітыкі, дыпламатыі, міжнародных адносін, міжнароднага права і канфлікталогіі.
Карысныя спасылкі
- Міжнародны дзень дружбы
- Сусветны дзень культурнай разнастайнасці ў імя дыялогу і развіцця (21 мая)
- Міжнародны дзень міру (21 верасня)
- Міжнародны дзень, прысвечаны памяркоўнасці (16 лістапада)
- Міжнародны год моладзі: дыялог і ўзаемаразуменне (12 жніўня 2010 года – 11 жніўня 2011 года)
- 2010 год: Міжнародны год збліжэння культур
- 2001 год: Год дыялогу паміж цывілізацыямі пад эгідай ААН
- 2001–2010: Міжнароднае дзесяцігоддзе культуры міру і ненасілля ў інтарэсах дзяцей планеты