З 27 снежня па 15 студзеня ў зале беларускай літаратуры (пам. 205) ладзіцца кніжная выстаўка “Карыфей славістыкі”, прысвечаная 150-гадоваму юбілею філолага-славіста Яўхіма Фёдаравіча Карскага.
З імем заснавальніка беларускага навуковага мовазнаўства і літаратуразнаўства, этнографа, фалькларыста, палеографа, педагога, акадэміка Пецярбургскай акадэміі навук, правадзейнага члена Інбелкульта і Чэшскай акадэміі навук Я. Ф. Карскага (1861–1931) звязана цэлая эпоха ў развіцці айчыннай і замежнай славістычнай навукі, даследаванні кардынальных праблем мовазнаўства.
Незвычайна плённымі з’яўляюцца здабыткі творчай дзейнасці Я. Карскага ў галіне этнаграфіі і фалькларыстыкі. Этнограф вывучаў вусна-паэтычную творчасць і побыт беларускага народа, яго цікавілі пытанні гісторыі і развіцця беларускай мовы, паходжання беларускай народнасці, межаў этнічнай тэрыторыі Беларусі.
Больш за 140 дакументаў, якія экспануюцца на выстаўцы, знаёмяць з кнігамі акадэміка, якія і па сённяшні дзень не страцілі сваёй навуковай значнасці і актуальнасці.
Галоўная праца вучонага – трохтомная манаграфія “Беларусы”, над якой Я. Карскі працаваў каля 40 гадоў. Яе называюць “энцыклапедыяй беларусазнаўства”. Цікавыя таксама даследаванні – “Обзор звуков и форм белорусской речи” (1885), “Западнорусские переводы псалтыри в ХV–XVII веках” (1896), “Белорусская речь” (1918), “Русская диалектология” (1924) і інш.
Асобным раздзелам экспазіцыі прадстаўлены кнігі, рэдактарам ці складальнікам якіх з’яўляецца Яўхім Фёдаравіч.
Апошні раздзел выстаўкі змяшчае публікацыі, кнігі і артыкулы пра жыццё і творчасць Я. Ф. Карскага.
Кантактны тэлефон: 293-27-16.
У музеі кнігі Нацыянальнай бібліятэкі Беларусі з 9 снежня па 15 студзеня ладзіцца выстаўка “Спадчына акадэміка Яўхіма Карскага: да 150-годдзя з дня нараджэння”.
 |
 |
||||||||||
 |
 |
