З 8 снежня па 13 студзеня ў зале дакументаў міжнародных арганізацый (пам. 207g) дэманструецца выстаўка “Карупцыя: прычыны, праблемы, процідзеянне”, прысвечаная Міжнароднаму дню барацьбы супраць карупцыі.
Гэты Дзень быў абвешчаны Генеральнай Асамблеяй ААН у лістападзе 2003 года (рэзалюцыя № A/RES/58/4) і штогод адзначаецца 9 снежня.
Карупцыя з’яўляецца складанай сацыяльнай, палітычнай і эканамічнай з’явай, якая ў той або іншай ступені закранае ўсе краіны. Яна разбурае дэмакратычныя інстытуты, запавольвае эканамічнае развіццё і падрывае дзяржаўныя асновы. Карупцыя паражае аснову дэмакратычных інстытутаў праз скажэнне выбарчых працэсаў, скажэнне прынцыпу вяршэнства закона і стварэнне бюракратычных бар’ераў, адзіны сэнс якіх – гэта вымагальніцтва хабараў.
Ушчамляючы неад’емныя правы чалавека, яна таксама абвастрае праблему галечы і ўзмацняе сацыяльную няроўнасць у выніку адцягнення сродкаў, якія маглі б выкарыстоўвацца ў мэтах аховы здароўя, адукацыі і аказання іншых жыццёва неабходных паслуг. Тое, што карупцыя – гэта вялікае зло, не па чутках ведаюць мільёны людзей ва ўсім свеце. Яе прычынамі, гэтак сама як і следствам, з’яўляюцца дзеянні злачынцаў, недзеяздольнасць дзяржаўных інстытутаў і неэфектыўнае кіраванне.
Асноўным міжнародным нарматыўным дакументам па пытаннях прадухілення карупцыі і барацьбе з ёю з’яўляецца Канвенцыя Арганізацыі Аб’яднаных Нацый супраць карупцыі, адкрытая для падпісання ў кастрычніку 2003 года, якая ўступіла ў сілу ў снежні 2005 года. На сённяшні дзень Канвенцыю падпісалі 140 дзяржаў і ратыфікавалі 80.
Гэты міжнародны дагавор прадугледжвае меры па папярэджанні карупцыі, пакаранні вінаватых, а таксама механізмы міжнароднага супрацоўніцтва ў барацьбе з ёю. Ён абавязвае дзяржавы-члены праводзіць палітыку процідзеяння карупцыі, адобрыць адпаведныя законы і заснаваць спецыяльныя органы для барацьбы з гэтай з’явай. У адпаведнасці з Канвенцыяй дзяржавы павінны дабівацца таго, каб іх службовыя асобы былі непадкупнымі, сумленнымі і адказнымі. За арыенцір прапаноўваецца ўзяць Міжнародны кодэкс паводзін дзяржаўных службовых асоб, адобраны Генеральнай Асамблей ААН яшчэ ў 1996 годзе. Канвенцыя абавязвае краіны папярэджваць і перарываць трансмежныя пераводы незаконна набытых актываў і ўмацоўваць міжнароднае супрацоўніцтва ў справе іх вяртання.
Падтрымліваючы і развіваючы ініцыятывы па барацьбе з карупцыяй на нацыянальным, рэгіянальным і міжнародным узроўнях, Рэспубліка Беларусь адной з першых дзяржаў-удзельніц ратыфікавала Канвенцыю ААН супраць карупцыі. Акрамя гэтай канвенцыі, ратыфікаваны і няўхільна выконваюцца такія асноўныя міжнародныя акты, як Канвенцыя Савета Еўропы аб крымінальнай адказнасці за карупцыю, Канвенцыя ААН супраць транснацыянальнай арганізаванай злачыннасці, Канвенцыя аб грамадзянска-прававой адказнасці за карупцыю.
Бескампрамісная і рашучая барацьба з карупцыяй з’яўляецца цэнтральным звяном унутранай палітыкі нашай дзяржавы. Базавым дакументам, на аснове якога арганізуецца антыкарупцыйная дзейнасць у нашай краіне, з’яўляецца Закон Рэспублікі Беларусь “Аб барацьбе з карупцыяй”, прыняты 20 ліпеня 2006 года.
На выстаўцы прадстаўлена звыш 60 дакументаў міжнародных арганізацый (ААН, Еўрапейскага саюза, Савета Еўропы і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН, брашуры, буклеты.
Экспазіцыя складаецца з наступных раздзелаў:
- Паняцце, формы і віды карупцыі. Уплыў карупцыі на развіццё грамадства.
- Міжнародныя прававыя дакументы, накіраваныя на барацьбу з карупцыяй.
- Асноўныя метады і напрамкі барацьбы з карупцыяй і яе асобнымі праявамі.
- Барацьба з карупцыяй у Рэспубліцы Беларусь.
Выстаўка будзе цікавай работнікам органаў дзяржаўнай улады і кіравання, супрацоўнікам праваахоўных органаў, пракурорам, суддзям, а таксама выкладчыкам, аспірантам і студэнтам юрыдычных ВНУ.
Карысныя спасылкі
- Міжнародны дзень барацьбы з карупцыяй
- Праграма развіцця ААН
- Упраўленне ААН па наркотыках і злачыннасці (УНЗ ААН)
- Кампанія ЮНОДК па барацьбе з карупцыяй: "Скажы сваё НЕ карупцыі"
- Даведнік матэрыялаў па барацьбе з карупцыяй
Дакументы
- Дэкларацыі і канвенцыі
- Генеральная Асамблея
- Эканамічны і Сацыяльны Савет
- Камісія па прадухіленні злачыннасці і крымінальным правасуддзі
- Міжурадавая рабочая група адкрытага складу па аглядзе ходу ажыццяўлення Канвенцыі ААН супраць карупцыі
- Канферэнцыя дзяржаў – удзельніц Канвенцыі ААН супраць карупцыі
- Першая сесія (Аман, 10–14 снежня 2006 года) [дакументы | рэзалюцыі]
- Другая сесія (Нуса Дуа, Інданезія, 28 студзеня – 1 лютага 2008 года)
- Трэцяя сесія (Даха, 9–13 лістапада 2009 года)
- Праект правіл працэдуры Канферэнцыі (CAC/COSP/2006/3)
- Стварэнне механізму агляду ажыццяўлення Канвенцыі ААН супраць карупцыі (CAC/COSP/WG.1/2007/2)