З 2 па 30 чэрвеня ў зале беларускай літаратуры (пам. 205) праходзіць выстаўка “Каралева высокага слова”, прымеркаваная да 170-годдзя з дня нараджэння польскай пісьменніцы, грамадскага дзеяча, педагога Элізы Ажэшкі (1841–1910).
Літаратурная спадчына Э. Ажэшкі вялікая – больш за пяцьдзясят тамоў твораў розных празаічных жанраў. Да іх далучаюцца дзесяць тамоў твораў эпісталярнага жанру высокай мастацкай вартасці: лісты да літаратараў, людзей навукі, сяброў-пісьменнікаў, перакладчыкаў, рэдактараў і выдаўцоў. Яе творы перакладзены на 20 еўрапейскіх моў. Усе раманы, аповесці, апавяданні, літаратурна-крытычныя і публіцыстычныя артыкулы звязаны з канкрэтнымі асаблівасцямі жыцця беларускага і польскага народаў у другой палове ХІХ ст. У сваіх творах пісьменніца заўсёды закранала вострыя праблемы сучаснасці, імкнулася перадаць сутнасць і дух часу.
Творы Элізы Ажэшкі маюць асаблівае значэнне для беларускага народа: лепшая частка яе творчай спадчыны прысвечана менавіта яму. Пісьменніца са спагадай “зазірнула” ў хату беларускага селяніна, не толькі жахнулася яго нядолі, але і ўбачыла духоўную прыгажосць, працавітасць і пачуццё адзінства з прыродай.
Экспазіцыя змяшчае каля 180 дакументаў і складаецца з двух раздзелаў.
У раздзеле “З творчай спадчыны Э. Ажэшкі” прадстаўлены як прыжыццёвыя выданні пісьменніцы на польскай мове, так і творы, выдадзеныя пасля яе смерці. Сярод іх аповесці “Niziny” (“Нізіны”), “Dziurdziowie” (“Дзюрдзі”), “Cham” (“Хам”), “Pan Graba” (“Пан Граба”), “Meir Ezofowicz” (“Мэір Эзафовіч”), апавяданне “Gedali” (“Гедалі”), раманы “Nad Niemnem” (“Над Нёманам”), “Marta” (“Марта”) і іншыя, а таксама яе эпісталярная спадчына. Працягваюць раздзел творы пісьменніцы, перакладзеныя на беларускую і рускую мовы. У ліку перакладчыкаў Я. Бяганская, Я. Брыль, В. Ластоўскі і інш.
Раздзел “На старонках часу: асоба і творчасць Э. Ажэшкі” змяшчае літаратуру беларускіх і польскіх даследчыкаў і літаратуразнаўцаў пра творчы і жыццёвы шлях пісьменніцы. Пра Э. Ажэшку пісьменнік-краязнавец У. Содаль сказаў такія словы: “Ажэшка, як ніхто да яе, апавядала свету пра беларусаў і Беларусь. Яна для нашага краю, як Гогаль для Украіны. Той быў сувязны між Украінай і Расіяй, а яна – між Беларуссю і Польшчай”.
Кантактны тэлефон: 293-27-16.
 |
 |
 |
 |
 |
 |
 |
 |
 |
