З 25 чэрвеня па 26 ліпеня ў зале нотных і аўдыёдакументаў (пам. 305) ладзіцца юбілейная выстаўка “Кампазітар-гуманіст”, прысвечаная 150-годдзю з дня нараджэння Густава Малера (1860–1911).
Густаў Малер – выдатны аўстрыйскі кампазітар і дырыжор, аўтар манументальных аркестравых твораў, адзін з найбуйнейшых оперных і сімфанічных дырыжораў. У яго музыцы выявіліся тэндэнцыі позняга рамантызму і рысы экспрэсіянізму. У цэнтры творчасці – бесперапынныя пошукі адказаў на спрадвечныя пытанні чалавечага быцця, тэма чалавечых пакут, звязаная з трагічным усведамленнем сацыяльных і духоўных супярэчнасцей эпохі.
У творчай спадчыне Г. Малера – 10 сімфоній (апошняя не завершана). Аднойчы кампазітар сказаў, што для яго сачыніць сімфонію – значыць усімі сродкамі музычнай тэхнікі пабудаваць свет.
Сярод іншых твораў аўтара – сімфонія-кантата для салістаў і аркестра “Песня аб Зямлі” (1909), вакальныя цыклы, у тым ліку для голасу з аркестрам “Песні вандроўнага чалядніка” (1883–1885), “Песні аб памерлых дзецях” (словы Ф. Рукерта, 1904) і інш. Вяршыняй песеннай творчасці з’яўляецца цыкл “Чароўны рог хлопчыка” (1892–1998).
На выстаўцы прадстаўлены нотныя выданні сачыненняў Г. Малера, фоназапісы яго твораў у выкананні знакамітых дырыжораў ХХ ст. (К. Кандрашына, Л. Бернстайна), а таксама артыкулы і кнігі пра творчасць кампазітара.
Кантактны тэлефон: 293-27-52.