18 мая у музеі кнігі Нацыянальнай бібліятэкі працавала выстава “П’едэстал”, прымеркаваная да Міжнароднага дня музеяў. Хто ж заняў пераможныя месцы на музейным п’едэстале?
Самы каштоўны экспанат – найвялікшы скарб беларускай культуры БІБЛІЯ, якую падрыхтаваў і выдаў першадрукар, асветнік-гуманіст Францыск Скарына. На выставе дэманстраваліся Кніга царстваў – комплекс з чатырох кніг Старога Запавету, выдадзены ў Празе ў 1518 г.
Самы старажытны рарытэт – усходні рукапіс ХIV ст. “АДКРЫВАЛЬНІК ІСЦІНЫ СУНЫ” (1377), напісаны на арабскай мове. Паходзіць з гомельскай калекцыі графа Ф.І. Паскевіча. Зборнік складаецца з каментарыяў на твор рэлігійна-філасофскага характару, што ўтрымлівае паданне аб словах і дзеяннях прарока Мухамада. Рукапіс дэманстраваўся ўпершыню.
Самы незвычайны экспанат – мікраскапічная НАНАБІБЛІЯ (2014), зробленая ў выглядзе мікрачыпа. З’яўляецца, па версіі выдаўцоў “Кнігі рэкордаў Гінеса”, самай мініяцюрнай Бібліяй у свеце. Яе памер 5 х 5 міліметраў. Прачытаць тэкст магчыма толькі з дапамогай мікраскопа з павелічэннем у 10 тыс. разоў.
Тэлефон для даведак: (8 017) 293 27 22.
Матэрыял прадастаўлены навукова-даследчым аддзелам кнігазнаўства.
