З 8 мая па 2 чэрвеня ў зале выяўленчых і відэадакументаў (пам. 307) праходзіць выстаўка “Іншыя сусветы: сюррэалізм і Сальвадор Далі” з калекцыі выяўленчых дакументаў бібліятэкі.
Сальвадор Далі (1904–1989) – іспанскі жывапісец, графік, скульптар, рэжысёр, пісьменнік. Адзін з самых вядомых прадстаўнікоў сюррэалізму. Мастак у абсалютна ашаламляльнай манеры выказаў сваё адмысловае бачанне сюррэалізму, вобразы якога ён знаходзіў у паўсядзённым асяроддзі, прытрымліваючыся ўстановак вынайдзенай ім тэорыі “крытычнай параноі”.
Сюррэалізм Далі не адрозніваў якія-небудзь асобныя бакі быцця – усё, што датыкалася да яго творчасці, ператваралася ў штосьці новае. С. Далі не рабіў выключэнняў ні для чаго: ён пісаў пра каханне і сэксуальную рэвалюцыю (“Загадка жадання”, 1926), гісторыю (“Аблічча вайны”, 1940), тэхніку (“Расшчапленне атама”, 1947), грамадства (“Загадка Гітлера”, 1939), рэлігію (“Хрыстос святога Хуана дэ ля Крус”, 1951). Яго карціны і малюнкі, напоўненыя нястрымнай фантазіяй і віртуознай тэхнікай выканання, уяўляюць сабой фантасмагорыі, у якіх самым ненатуральным сітуацыям і спалучэнням прадметаў нададзена яўная дакладнасць і пераканаўчасць.
Акрамя стварэння жывапісных палотнаў, С. Далі ілюстраваў кнігі, выпускаў уласныя, прыдумляў дызайнерскія распрацоўкі для такіх модных дамоў, як “Ніна Рычы”, “Крысціян Дыёр”, “Іў Сэн-Ларан”, а таксама дадаваў сюррэалістычныя дэталі ў рэкламу, балет, фільмы і г.д.
На выстаўцы прадстаўлена звыш 80 дакументаў. Гэта кнігі, альбомы, рэпрадукцыі карцін, артыкулы, прысвечаныя майстру. Сярод экспанатаў – кнігі самога мастака “Афоризмы гения” (2000), “Дневник одного гения” (2012), “Моя тайная жизнь” (2003), успаміны яго блізкага сябра Аманды Лір “Дали глазами Аманды” (2005).
Кантактны тэлефон: (8 017) 293 27 58.