З 12 па 31 сакавіка ў Нацыянальнай бібліятэцы Беларусі (2-гі паверх, кальцавы калідор) размешчана выстаўка, прысвечаная 20-годдзю з часу прыняцця Канстытуцыі Рэспублікі Беларусь.
Ідэалогія дзяржавы – гэта нацыянальная ідэя, якая згуртоўвае і мабілізуе, дазваляе людзям розных перакананняў прыйсці да ўсведамлення агульных каштоўнасцей, спрыяе ўсталяванню ў грамадстве атмасферы згоды і стварэння.
Асновы ідэалогіі беларускай дзяржавы афіцыйна сфармуляваны ў Канстытуцыі Рэспублікі Беларусь, дзе выкладзены галоўны прынцып правядзення дзяржаўнай палітыкі ў нашай краіне: усё павінна рабіцца для чалавека і ў інтарэсах Беларусі.
Нацыянальная бібліятэка Беларусі прапануе тэматычную кніжную выстаўку “Ідэалогія беларускай дзяржавы: сутнасць, прызначэнне, магчымасці”, мэта якой – прадставіць асноўныя вехі канстытуцыйнага развіцця нашай краіны праз рэтраспектыўны аналіз, паказаць гістарычную пераемнасць Статута Вялікага Княства Літоўскага і сучаснага Асноўнага Закона Рэспублікі Беларусь.
Выстаўка ўключае каля 200 дакументаў, у якіх выдзелены ключавыя пастулаты ідэалагічных канцэпцый, што складаюць светапоглядную аснову нацыянальнай ідэалогіі, пытанні канстытуцыйнага права Беларусі, раскрываюцца месца і роля палітычных інстытутаў і грамадскіх арганізацый у ідэалагічных працэсах. Галоўнае месца ў экспазіцыі займаюць стэрэатыпныя выданні Канстытуцыі Рэспублікі Беларусь 1994 г. са змяненнямі і дапаўненнямі, прынятымі на рэспубліканскіх рэферэндумах 24 лістапада 1996 г. і 17 кастрычніка 2004 г., а таксама кнігі, якія раскрываюць яе сутнасць і значэнне ў сучасных умовах.
Экспазіцыя будзе цікавая для шырокага круга чытачоў і наведвальнікаў бібліятэкі.
Кантактны тэлефон: (8 017) 293 28 86.
 |
 |
 |
 |
 |
 |
 |
 |
 |
