З 29 красавіка 2008 года ў Нацыянальнай бібліятэцы Беларусі арганізавана тэматычная кніжная выстаўка, прысвечаная Дню Вялікай Перамогі.
Колькі бы не прайшло вёсен пасля пераможнага мая 1945 года, мы будзем памятаць радавых і генералаў, мужчын і жанчын, юнакоў, якія толькі ўсталі са школьнай парты, і бацькоў шматдзетных сямействаў, людзей розных нацыянальнасцей і веравызнанняў, якія абаранілі родную зямлю і выратавалі яе будучыню. Яны не шкадавалі сябе, хаця кожны з іх вельмі хацеў дажыць да Перамогі... Вечная памяць героям!
На змену аднаму пакаленню прыходзіць іншае. Франтавыя ордэны і медалі становяцца музейнымі рэліквіямі. Для моладзі Вялікая Айчынная стала гісторыяй... Але заўсёды будуць ляжаць кветкі ў Вечнага агню. Подзвіг народа несмяротны!
У экспазіцыі прадстаўлены звыш 150 кніг, выдадзеных за апошнія тры гады, што расказваюць аб гераічнасці, мужнасці і трываласці савецкіх людзей у гады Вялікай Айчыннай вайны, іх самаахвярнай адданасці сваёй Радзіме. Тут і аповеды аб унікальных чалавечых лёсах, невядомыя або малавядомыя ваенныя падзеі, інтэрнацыянальны характар подзвігаў, здзейсненых у імя Перамогі, а галоўнае – святая памяць аб тых, хто заваяваў права на неўміручасць самай дарогай цаной – цаной жыцця. Матэрыялы выстаўкі адлюстроўваюць значэнне перамогі савецкага народа над фашызмам для ўсяго свету, высокую маральную каштоўнасць традыцый, яркі жыццёвы прыклад старэйшага пакалення ў патрыятычным выхаванні моладзі.
Усё гэтае і шматлікае іншае, што складае змест выстаўкі, вызначае яе галоўную мэту, якую можна выказаць вядомымі словамі: "Ніхто не забыты, нішто не забыта!". Здзейсненае імі вечна!
Экспазіцыя размешчаная на 2-м паверсе кальцавога калідора.
Кантактны тэлефон 293-28-86.