З 20 лістапада па 13 снежня ў зале беларускай літаратуры (пам. 205) праходзіць выстаўка “І фарбамі спяваць паспрабавала…”, прысвечаная 70-годдзю беларускай паэтэсы Соф’і Шах.
Прадстаўленыя ў экспазіцыі выданні пазнаёмяць наведвальнікаў з літаратурнай дзейнасцю беларускай пісьменніцы. На творчым рахунку Соф’і Шах – вершы, вянкі санетаў (іх больш за 200), вянкі вянкоў санетаў, якія склалі зборнікі “Адухаўленне”, “Прысвячэнне”, “Прызначэнне”, “На ўсё дабро ў адказ”, “Спасціжэнне”, “Увасабленне”, “Азарычы”, “Каб тое выказаць...”, “Мару стаць я мастаком” і інш.
Паэтэсу хвалююць розныя праявы жыцця. Яе лірыка прасякнута спадзяваннем на ўсё добрае, шчырае і праўдзівае. Цёплыя і пранікнёныя радкі прысвяціла Соф’я Шах самым дарагім чалавечым пачуццям і найперш – каханню. У сваёй творчасці яна кранае тэмы жыцця і яго сэнсу, разважае аб сваёй бацькаўшчыне, аб усенацыянальнай бядзе – Чарнобылі.
Вядомы крытык Уладзімір Гніламёдаў у аглядзе сучаснай паэзіі пісаў: “Не так даўно я адзначыў для сябе новае імя – Соф’я Шах. Голас не гучны, але вельмі праўдзівы. На маю думку, гэта сапраўдная паэзія і па-сапраўднаму грамадзянская, маральна змястоўная… Тут ёсць жывы чалавечы характар, ёсць герой, з асобай якога паэтэса не баіцца ідэнтыфікаваць сябе. Вобразнасць, што вынікае са светапогляду паэтэсы, з яе светаўспрымання, выбудаваная на народнай аснове”.
Вершы С. Шах прадстаўлены таксама ў кнігах “Краса і сіла: анталогія беларускай паэзіі XX стагоддзя”, “Из века в век. Белорусская поэзия”, “Маладыя галасы”, “Лагодны прамень раніцы”.
Дапаўняюць экспазіцыю вучэбна-метадычныя дапаможнікі “Вучым гаварыць і думаць”, “Ад імгнення – да стагоддзя”, аўтарам якіх з’яўляецца Соф’я Шах, лагапед па спецыяльнасці. Карыснымі для настаўнікаў будуць кнігі “Займальная граматыка для пачатковых класаў” і “Займальная граматыка для сярэдніх класаў”.
Выстаўка разлічана на шырокае кола чытачоў.
Тэлефон для даведак: (8 017) 293 27 16.
 |
 |
 |
 |
 |
 |
