З 12 студзеня па 2 лютага ў зале нотных і аўдыявізуальных дакументаў (пам. 305) дэманструецца выстаўка “Гукі, поўныя паэзіі”, прысвечаная 150-годдзю з дня нараджэння рускага кампазітара В.С. Каліннікава.
Васіль Сяргеевіч Каліннікаў нарадзіўся 13 студзеня 1866 года ў вёсцы Воіны Арлоўскай вобласці. Паходзіў з сям’і чыноўніка. Пачатковую адукацыю атрымаў у арлоўскай духоўнай семінарыі. У 1884 годзе паступіў у Музычна-драматычнае вучылішча Маскоўскага філарманічнага таварыства (клас тэорыі кампазіцыі А.А. Ільінскага і П.І. Бларамберга), якое скончыў у 1892 годзе. Іграў у аркестры, выкладаў спевы ў гарадскіх вучылішчах, выступаў у якасці дырыжора. Першыя сачыненні кампазітара (сімфанічная карціна “Німфы” (1889), уверцюра да кантаты “Іаан Дамаскін” (1890), “Серэнада” для струннага аркестра (1891)) былі выкананы яшчэ ў яго студэнцкія гады.
Шырокую вядомасць прынесла Каліннікаву яго 1-я сімфонія (1895), якая выконвалася з вялікім поспехам у Расіі і за мяжой. Сімфонія вылучаецца песеннай шыратой і выразнасцю тэм, паэтычнай мяккасцю каларыту. 2-я сімфонія (1897) задумана ў эпічным плане. Таксама ў гэты перыяд створаны два інтэрмецца для аркестра, сімфанічная карціна “Кедр і пальма” (паводле верша Гейнэ, 1898), музыка да трагедыі “Цар Барыс” А.К. Талстога (1898). З фартэпіянных п’ес папулярная “Сумная песенька” (1892), вытрыманая ў характэрным для кампазітара тоне мяккай, элегічнай задуменнасці. У меладычным складзе яе ясна чуюцца інтанацыі рускай народнай песні. Сярод рамансаў найбольш вядомыя і часта выконваемыя "На старым кургане" (1890, на словы І. Нікіціна), “Званы” (1901, словы К.Р.), “Нам зоркі ціхія ззялі” (словы А. Пляшчэева).
На выстаўцы можна пазнаёміцца з нотамі і аўдыязапісамі гэтых і іншых твораў у выкананні Дзяржаўнага акадэмічнага сімфанічнага аркестра пад кіраўніцтвам Яўгенія Святланава, квартэта рускіх народных інструментаў “Сказ”, акадэмічнага рускага хору пад кіраўніцтвам Ігара Агафоннікава і іншых калектываў.
У экспазіцыі прадстаўлены збор твораў В. Каліннікава ў 8-мі тамах (вакальная, фартэпіянная, сімфанічная і вакальна-сімфанічная творчасць), пісьмы кампазітара, а таксама кнігі і выбраныя артыкулы пра яго жыццё і творчы шлях.
Кантактны тэлефон: (8 017) 293 27 52.