ГалоўнаяНавіныМастацкія выстаўкі
Лета з добрай кнігай
Дар бібліятэцы

Грані творчасці

Грані творчасці
Іншыя навіны

31 мая ў галерэі “Ракурс” бібліятэкі адбылося ўрачыстае адкрыццё I Рэспубліканскай выстаўкі студэнцкай творчасці “Грані творчасці”.


У 2016 годзе выстаўка праходзіць пад дэвізам “Багдановіч. Маладыя жаданні” і прымеркавана да 125-годдзя з дня нараджэння самага рамантычнага паэта беларускай літаратуры. Нягледзячы на тое што Максім Багдановіч пражыў усяго 25 гадоў, ён пакінуў багатую спадчыну свайму народу. Вобраз паэта, героі яго твораў натхняюць ужо не адно пакаленне майстроў на стварэнне выдатных работ. Прадстаўленыя на экспазіцыі працы студэнцкай моладзі з’яўляюцца гэтаму лепшым пацвярджэннем. Тут і чароўная “Вераніка”, “Зорка Венера”, міфічныя лясун, вадзянік, русалка і, канечне, знакамітыя “Слуцкія ткачыхі”.

“Маладыя гады, маладыя жаданні…” − з гэтых слоў пачалася ўрачыстая цырымонія адкрыцця экспазіцыі. З вітальным словам да ўдзельнікаў і гасцей мерапрыемства выступіў намеснік міністра адукацыі Рэспублікі Беларусь Віктар Віктаравіч Якжык. Ён адзначыў, што арганізаваная выстаўка з’яўляецца першай у сваім родзе. “Грані творчасці” − гэта прынцыпова новы рэспубліканскі праект, запланаваны мінімум на дзесяць гадоў. Віктар Віктаравіч падзякаваў таленавітай моладзі за выдатныя работы і пажадаў юнакам і дзяўчатам далейшых творчых поспехаў.

Дзякуючы праекту студэнты ўсёй краіны звярнуліся да твораў Максіма Багдановіча і адлюстравалі ў сваіх работах лірычны настрой і перажыванні маладога паэта. Словы ўдзячнасці ініцыятарам, ідэйным натхняльнікам і ўдзельнікам выказала дырэктар Нацыянальнага цэнтра мастацкай творчасці дзяцей і моладзі Міністэрства адукацыі Рэспублікі Беларусь Надзея Васільеўна Васільчанка. “Дыялог праз стагоддзі” – так яна вызначыла галоўную мэту праекта, пажадаўшы яму даўгалецця, новых аўтараў і новых ідэй.

У адкрыцці экспазіцыі прынялі ўдзел загадчык сектара мастацкіх выставак Нацыянальнай бібліятэкі Беларусі Вольга Сяргееўна Давідовіч і начальнік упраўлення па справах моладзі Міністэрства адукацыі Рэспублікі Беларусь Наталля Іванаўна Пшанічная.

Нестандартнай і новай з’яўляецца не толькі сама выстаўка, але і актуальныя ў маладзёжным асяроддзі кірункі сучаснай творчасці. “Летарынг «Вянок вянкоў»”, “Фота-альтернат «Я хацеў бы спаткацца з вамі…»”, "Канцэптуальны візуальны сэт «Спасціжэнне красы»” – так гучаць намінацыі, у якіх экспертная група будзе вызначаць лепшыя работы.

У складзе экспертнай групы – намеснік дырэктара па творчай рабоце Нацыянальнага цэнтра сучасных мастацтваў Рэспублікі Беларусь Дзяніс Валер’евіч Барсукоў, дырэктар выдавецкага дома “Мэджык” Юрый Іосіфавіч Будзько, галоўны спецыяліст інфармацыйнай палітыкі “Белгазпрамбанка”, кандыдат мастацтвазнаўства Аляксандр Аляксандравіч Зіменка, намеснік дырэктара па выставачнай дзейнасці рэспубліканскай мастацкай галерэі “Палац мастацтва” Наталля Аляксандраўна Барсукова, дырэктар фотастудыі “Marxstudio”, фотамастак Міхаіл Міхайлавіч Маруга і шэф-рэдактар часопіса “Taxi”, мастак Сяргей Уладзіміравіч Стальмашонак.

Наперадзе экспертную групу чакае вялікая і вельмі цікавая праца па вызначэнні лепшых з лепшых, а на адкрыцці экспазіцыі члены камісіі натхнёна прачыталі вершы Максіма Багдановіча і падзяліліся сваімі ўражаннямі аб прадстаўленых работах.

Лірычную атмасферу мерапрыемству надалі музычныя кампазіцыі на вершы паэта ў выкананні студэнтаў Аліны Аўчыннікавай (“Па-над белым пухам вішняў”), Піліпа Смялова (“Алеся”), Дзмітрыя Нікіціна (“Ой, княжна”), Вадзіма Авіжыча (“За паўгадзіны…”). Асабліва парадавалі гледачоў студэнты Беларускай дзяржаўнай акадэміі музыкі з Кітая Мэн Сян Чэнь, Ван Болунь і Сун Юй, якія прачыталі з душой і натхненнем “Слуцкіх ткачых” на беларускай мове.

“Песня рвецца i лiецца на раздольны, вольны свет. Але хто яе пачуе? Можа толькi сам паэт…” – разважаў Максім Багдановіч. Адкрыццё выстаўкі “Грані творчасці” развеяла ўсе сумненні: вершы беларускага паэта чутныя праз стагоддзі. Важна, што іх успрымае моладзь, перажываючы сугучча пачуццяў і адзінства маладых жаданняў далёкіх пакаленняў.

Экспазіцыя размешчана ў галерэі "Ракурс" (2-гі паверх) і будзе дэманстравацца да 5 ліпеня 2016 года.

Тэлефоны для даведак: (8 017) 293 27 56, 293 28 33.
Е-mail: pr@nlb.by

 

Навіны

Практыкум па ўжыванні УДК на беларускай мове

18 Лют 2020

У Мінскай абласной бібліятэцы імя А.С. Пушкіна 20 лютага адбудзецца практыкум, прысвечаны ўжыванню міжнароднай класіфікацыйнай сістэмы “Універсальная дзесятковая класіфікацыя” на беларускай мове для арганізацыі краязнаўчых фондаў і іх адлюстравання ў інфармацыйна-пошукавых сістэмах публічных бібліятэк.

Навіны Нацыянальнай бібліятэкі Беларусі

"Лепшыя кнігі Беларусі": выстаўка па выніках LIХ Нацыянальнага конкурсу "Мастацтва кнігі"

18 Лют 2020

З 18 лютага па 18 красавіка ў бібліятэцы (3-ці паверх, кальцавы калідор) праходзіць выстаўка выданняў, адзначаных узнагародамі LIХ Нацыянальнага конкурсу “Мастацтва кнігі”.

Кніжныя выстаўкі

Прэзентацыя электроннага выдання "Не пакідайце ж мовы нашай беларускай…"

14 Лют 2020

19 лютага ладзіцца прэзентацыя электроннага выдання “Не пакідайце ж мовы нашай беларускай…”, прысвечанага 180-годдзю з дня нараджэння Францішка Багушэвіча.

Навіны Нацыянальнай бібліятэкі Беларусі

Духоўная асвета праз дзейнасць бібліятэк: да 500-годдзя з дня заснавання Свята-Успенскага Жыровіцкага манастыра

14 Лют 2020

12 лютага ў ГУ “Цэнтралізаваная сістэма дзіцячых бібліятэк г. Мінска” адбыўся круглы стол “Духоўная асвета праз дзейнасць бібліятэк: да 500-годдзя з дня заснавання Свята-Успенскага Жыровіцкага манастыра”.

Навіны Нацыянальнай бібліятэкі Беларусі

111