З 1 кастрычніка па 8 лістапада ў зале дакументаў міжнародных арганізацый (2-гі паверх, пам. 207g) адкрыта тэматычная кніжная выстаўка “Грамадства для ўсіх узростаў”, прысвечаная Міжнароднаму дню пажылых людзей.
Гэты Дзень быў абвешчаны на 45-й сесіі Генеральнай Асамблеі ААН (рэзалюцыя 45/106) 14 снежня 1990 года і штогод адзначаецца 1 кастрычніка.
Гэтае свята – даніна павагі і ўвагі да людзей, за плячамі якіх шматгадовая праца, нялёгкія выпрабаванні, багаты жыццёвы вопыт. Ва ўсе часы ў грамадстве з асаблівай пашанай ставіліся да старэйшага пакалення, якое ўвасабляе мудрасць, лепшыя рысы і традыцыі народа.
У наш час ў свеце назіраецца ўстойлівая тэндэнцыя старэння насельніцтва. У адпаведнасці з класіфікацыяй Сусветнай арганізацыі аховы здароўя, да пажылога насельніцтва адносяцца людзі ва ўзросце ад 60 да 74 гадоў, да старога – ад 75 да 89 гадоў, да доўгажыхароў – 90 гадоў і старэйшыя. Цяпер колькасць людзей, узрост якіх перавышае 60 год, складае прыкладна 10 працэнтаў ад агульнай колькасці жыхароў Зямлі, у 2050 годзе іх колькасць вырасце да 21 працэнта. Згодна з апошнімі даследаваннямі, да 2050 года колькасць пажылых людзей у свеце павялічыцца з 600 мільёнаў да амаль 2 мільярдаў.
Новы сацыяльны статус чалавека ў старасці, выкліканы перш за ўсё спыненнем ці абмежаваннем працоўнай дзейнасці, зменамі самога ладу жыцця і зносін, цяжкасцямі адаптацыі да новых умоў жыцця, патрабуе асаблівай падтрымкі як сацыяльных службаў дзяржавы, так і людзей, якія жывуць побач.
Прынцып ААН адносна пажылых людзей – зрабіць паўнакроўным жыццё асоб састарэлага ўзросту, забяспечыць ім неабходны дагляд і ўмовы для ўдзелу ў жыцці грамадства і рэалізацыі іх унутранага патэнцыялу.
У Рэспубліцы Беларусь пажылым людзям надаецца вялікая ўвага з боку дзяржавы. У краіне створана маштабная сістэма сацыяльнай абароны пажылых людзей, якая ўключае прадастаўленне разнастайных ільгот і гарантый, павышэнне пенсій, сацыяльнае абслугоўванне і дапамогу дома.
Прапанаваная тэматычная выстаўка заклікана прыцягнуць увагу чытача да праблем людзей пажылога ўзросту, іх індывідуальных і сацыяльных патрэб, павысіць ступень інфармаванасці па праблеме дэмаграфічнага старэння грамадства.
Выстаўка ўключае наступныя тэматычныя раздзелы:
- міжнародныя дакументы, скіраваныя на поўнае ажыццяўленне ўсіх праў і асноўных свабодпажылых людзей;
- удзел пажылых людзей у эканамічным, палітычным і сацыяльным жыцці грамадства;
- медыцынскаядапамога, падтрымка і сацыяльная абарона пажылых людзей;
- дэмаграфічнае старэнне грамадства: статыстычныя даныя;
- пажылыя людзі ў Рэспубліцы Беларусь.
Экспазіцыя налічвае каля 60 дакументаў, большую частку якіх складаюць дакументы міжнародных арганізацый (ААН, ЮНЕСКА, Еўрапейскага саюза, Савета Еўропы і інш.) на рускай і англійскай мовах: кнігі, перыядычныя выданні, мімеаграфаваныя матэрыялы ААН.
Выстаўка будзе цікавай сацыёлагам, супрацоўнікам органаў дзяржаўнага кіравання, сацыяльным работнікам, выкладчыкам і студэнтам вышэйшых навучальных устаноў, а таксама ўсім, хто цікавіцца сучаснымі сацыяльнымі, дэмаграфічнымі і сацыяльна-эканамічнымі праблемамі.
Карысныя спасылкі
- Міжнародны год пажылых людзей (1999 год)
- Артыкул каардынатара ААН па пытаннях старэння
- Канферэнцыя міністраў ЕЭК ААН (Берлін, 11–13 верасня 2002 года)
- Прынцыпы ААН адносна пажылых людзей(1991 год)
- Міжнародны (Венскі) план дзеянняў па праблемах старэння (зацверджаны Сусветнай асамблеяй па праблемах старэння, Вена, 26 ліпеня – 6 жніўня 1982 года)
- Старэнне насельніцтва свету: 1950–2050 гады
Дакументы
- Рэзалюцыя Генеральнай Асамблеі па абвяшчэнні Дня (A/RES/45/106)
- Асноўныя змены ў вобласці старэння, якія адбыліся ў перыяд пасля правядзення II Сусветнай асамблеі па праблемах старэння (E/CN.5/2007/7)
- Даклады Генеральнага сакратара ААН «Наступная дзейнасць па выніках Сусветнай асамблеі па праблемах старэння»
- Рэзалюцыі і рашэнні Генеральнай асамблеі і ЭКАСАС
- Камісія сацыяльнага развіцця: Механізмы агляду і ацэнкі Мадрыдскага міжнароднага плана дзеянняў па праблемах старэння
- Палітычная дэкларацыя і Мадрыдскі міжнародны план дзеянняў па праблемах старэння (2002 год)
- Берлінская міністэрская дэкларацыя (2002 год)
- Дэкларацыя па праблемах старэння (1992 год)
- Прынцыпы ААН адносна пажылых людзей (1991 год)
- Міжнародны (Венскі) план дзеянняў па праблемах старэння (зацверджаны Сусветнай асамблеяй па праблемах старэння, Вена, 26 ліпеня – 6 жніўня 1982 года)