З 12 чэрвеня па 7 ліпеня ў аддзеле абслугоўвання афіцыйнымі дакументамі (пам. 207) адкрыта выстаўка “Грамадства без наркотыкаў – наш выбар!”, прысвечаная Міжнароднаму дню барацьбы супраць злоўжывання наркатычных сродкаў і іх незаконнага абароту.
Гэты Дзень быў абвешчаны Генеральнай Асамблеяй ААН 7 снежня 1987 года (рэзалюцыя 42/112) і штогод адзначаецца 26 чэрвеня.
Генеральная Асамблея прызнала, што, нягледзячы на моцную актывізацыю намаганняў міжнароднага супольніцтва, сусветная праблема наркотыкаў па-ранейшаму з’яўляецца сур’ёзнай пагрозай для здароўя насельніцтва, бяспекі і дабрабыту людзей, асабліва моладзі, а таксама для нацыянальнай бяспекі і суверэнітэту дзяржаў, што яна наносіць шкоду сацыяльна-эканамічнай і палітычнай стабільнасці і ўстойліваму развіццю.
Асамблея выказала рашучасць узмацніць дзейнасць сусветнага супольніцтва, накіраваную на стварэнне грамадства, свабоднага ад злоўжывання наркотыкамі, і заклікала ўрады, сродкі масавай інфармацыі і грамадзянскае супольніцтва зрабіць усё магчымае, каб павысіць інфармаванасць насельніцтва пра шкоду наркотыкаў, садзейнічаць таму, каб людзі не ўзбагачаліся за кошт тых, хто іх ужывае.
Гісторыя барацьбы супраць распаўсюджвання наркотыкаў або, па крайняй меры, спроб неяк кантраляваць іх абарот налічвае ўжо больш за 100 гадоў, аднак і сёння, праз больш як стагоддзе, праваахоўныя органы, на жаль, далёкія ад рашэння гэтай праблемы.
У Сусветным дакладзе аб наркотыках 2013 года, прадстаўленым у Вене 26 чэрвеня на спецыяльнай 56-й сесіі Камісіі па наркатычных сродках, гаворыцца, што ін’екцыйныя наркотыкі ў свеце ўжываюць чатырнаццаць мільёнаў чалавек ва ўзросце ад 15 да 64 гадоў.
Сусветны рынак наркотыкаў пастаянна папаўняюць новыя шкодныя рэчывы, якія не забаронены, але аказваюць моцны псіхатропны эфект, прычым прадаюцца яны часцяком абсалютна адкрыта, у тым ліку праз інтэрнэт.
Разумеючы ўсю небяспеку пагрозы, ААН сур’ёзна займаецца міжнародным кантролем над наркотыкамі. З гэтай мэтай створана Камісія па наркатычных сродках, якая служыць галоўным міжурадавым органам па выпрацоўцы палітыкі і каардынацыі міжнароднага кантролю над наркотыкамі. Маючы ў сваім саставе 53 дзяржавы-члены, у тым ліку і Беларусь, камісія аналізуе сітуацыю з наркаманіяй у сусветным маштабе і рыхтуе прапановы па ўзмацненні міжнароднага кантролю над наркотыкамі.
У Рэспубліцы Беларусь праблема барацьбы супраць незаконнага абароту наркатычных сродкаў і псіхатропных рэчываў з’яўляецца важным напрамкам палітыкі дзяржавы. Наша краіна з’яўляецца ўдзельніцай Адзінай канвенцыі аб наркатычных сродках, Канвенцыі аб псіхатропных рэчывах, а таксама Канвенцыі ААН аб барацьбе супраць незаконнага абароту наркатычных сродкаў і псіхатропных рэчываў. Пастановай Савета Міністраў Рэспублікі Беларусь у 2008 годзе была зацверджана Дзяржаўная праграма комплексных мер процідзеяння наркаманіі, незаконнаму абароту наркотыкаў і звязаным з імі правапарушэнням ў Рэспубліцы Беларусь на 2009–2013 гады. У рамках выканання мерапрыемстваў гэтай Праграмы ў 2012 годзе прыняты Закон Рэспублікі Беларусь “Аб наркатычных сродках, псіхатропных рэчывах, іх прэкурсорах і аналагах”, у якім былі вызначаны асноўныя напрамкі дзяржаўнай палітыкі ў сферы барацьбы з незаконным абаротам наркатычных сродкаў, адным з якіх з’яўляецца крымінальна-прававая барацьба з гэтай з’явай. З гэтымі дакументамі можна азнаёміцца на прадстаўленай выстаўцы.
Выстаўка складаецца з наступных раздзелаў:
- Наркотыкі і грамадства: гістарычны нарыс.
- Прававыя меры процідзеяння незаконнаму абароту наркотыкаў і міжнародны кантроль за іх распаўсюджваннем.
- Папярэджанне і прафілактыка наркаманіі, лячэнне і рэабілітацыя нарказалежнасці.
- Барацьба супраць наркаспажывання і незаконнага абароту наркотыкаў у Рэспубліцы Беларусь.
У экспазіцыі прадстаўлена звыш 100 дакументаў на рускай, нямецкай, французскай і англійскай мовах. У асноўным гэта дакументы міжнародных арганізацый: кнігі, перыядычныя выданні, мімеаграфаваныя матэрыялы ААН, брашуры.
Выстаўка адрасуецца сацыяльным і медыцынскім работнікам, супрацоўнікам праваахоўных органаў, выкладчыкам і студэнтам, педагогам і бацькам, а таксама ўсім, хто цікавіцца праблемамі наркаманіі.
Карысныя спасылкі
- Міжнародны дзень барацьбы супраць злоўжывання наркатычнымі сродкамі і іх незаконным абаротам
- Міжнародная кампанія па наркотыках
- Упраўленне ААН па наркотыках і злачыннасці (УНЗААН)
- Камісія па наркатычных сродках
- Міжнародны камітэт па кантролі над наркотыкамі
- Барацьба супраць незаконных наркотыкаў
- Дзесяцігоддзе ААН па барацьбе супраць злоўжывання наркотыкамі (1991–2000) [A/RES/S-17/2]
Дакументы
- Сусветны даклад аб наркотыках
- Рэзалюцыі Генеральнай Асамблеі
- Даклады Генеральнага сакратара
- Даклады Камісіі па наркатычных сродках
- Даклады Міжнароднага камітэта па кантролі над наркотыкамі
- Дэкларацыі
- Канвенцыі і пагадненні