З 1 па 29 лютага ў Нацыянальнай бібліятэцы Беларусі (2-гі паверх, кальцавы калідор) арганізавана выстаўка “Гонар маем!”, прысвечаная Дню абаронцаў Айчыны і Узброеных Сіл Рэспублікі Беларусь.
Дзень Абаронцаў Айчыны – адно з самых любімых свят у нашай краіне. У гэты дзень віншаванні атрымліваюць не толькі ветэраны вайны і вайскоўцы, але і тыя, хто яшчэ толькі рыхтуецца выканаць свой абавязак перад Айчынай.
Дзень абаронцаў Айчыны і Узброеных Сіл традыцыйна асацыіруецца з такімі паняццямі як “мужнасць”, “гераізм”, “любоў” да Радзімы. 23 лютага – гэта ўсенароднае свята, калі мы ўшаноўваем нашых абаронцаў, якія сваёй мужнасцю і стойкасцю ў Вялікай Айчыннай вайне сапраўды выратавалі не толькі сваю Радзіму, але і ўвесь свет ад нямецкай акупацыі і столькі гадоў захоўваюць мір у нашай краіне.
Напярэдадні свята Нацыянальная бібліятэка Беларусі запрашае наведаць тэматычную кніжную выстаўку “Гонар маем!”. У экспазіцыі прадстаўлена больш за 150 дакументаў пра ваеннае майстэрства, віды ўзбраення, гісторыю і сучасны стан Узброеных Сіл Рэспублікі Беларусь.
Адкрывае экспазіцыю шэраг даведачна-інфармацыйных выданняў ваеннай тэматыкі: энцыклапедычны слоўнік “Военное дело” Ф.А. Бракгаўза і І.А. Ефрона, у якім дадзеная тэма асвятляецца з глыбокай старажытнасці да XX ст., рэпрынтнае шматтомнае выданне “Военная энциклопедия”, выпушчанае знакамітай пецярбургскай друкарняй “Товарищество И.Д. Сытина”, сучасныя ваенныя энцыклапедычныя і тлумачальныя слоўнікі, а таксама навукова-папулярнае выданне “История войн” пра развіццё ваеннага майстэрства ад антычнасці да ХХІ ст.
Асобным блокам прадстаўлены выданні, падрыхтаваныя Міністэрствам абароны Рэспублікі Беларусь: кніга “Вооруженные Силы Республики Беларусь: 90 лет на страже Отечества”; электроннае выданне “Вооруженные Силы Республики Беларусь: новейшая история белорусской армии” на 12 дысках; паэтычны зборнік “Мы храним тебя, Беларусь!”; часопіс “Армия” і яго літаратурна-мастацкі дадатак “Армия и культура”.
Гэтыя і многія іншыя выданні прапаноўваюць чытачам максімальна дакладную інфармацыю пра гісторыю і сучасныя пераўтварэнні беларускай арміі, спрыяюць ваенна-патрыятычнаму выхаванню моладзі, а значыць, служаць умацаванню незалежнасці, сілы і росквіту нашай Радзімы.
Кантактны тэлефон: 293-28-86.