З 1 лютага па 19 сакавіка ў зале нотных і аўдыядакументаў (пам. 305) ладзіцца выстаўка “Глыбіні слова і музыкі”, прысвечаная 200-годдзю з дня нараджэння рускага кампазітара А.С. Даргамыжскага.
Творчасць Аляксандра Сяргеевіча Даргамыжскага (1813–1869) аказала істотны ўплыў на развіццё рускага музычнага мастацтва XIX ст. Разам з Міхаілам Глінкай ён з’яўляецца заснавальнікам рэалістычнага напрамку ў рускай музыцы, паслядоўнікамі якога сталі многія кампазітары.
У цэнтры творчых інтарэсаў кампазітара была камерна-вакальная музыка – рамансы, песні, арыі, дуэты. Асноўным сродкам стварэння пэўнага індывідуальнага вобраза для яго служыла прайграванне жывых інтанацый чалавечага маўлення. Сваё мастацкае крэда ён выдатна вызначыў у словах: “Хачу, каб гук непасрэдна выражаў слова. Хачу праўды”.
Аляксандр Даргамыжскі пашырыў сферу вакальнай лірыкі, узбагаціў яе жанры. Ствараючы песні і рамансы, ён звяртаўся да паэзіі М. Лермантава, А. Кальцова, А. Дэльвіга, В. Жукоўскага, але больш за ўсіх – да вершаў А. Пушкіна. Пушкінскія творы ўзяты ў аснову опер, шматлікія вершы вялікага паэта ён паклаў на музыку.
Кампазітар быў наватарам у плане опернай мовы, стварыў новы жанр рускай оперы – народна-бытавую псіхалагічную драму, упершыню ўвасобіў у музыцы тэму сацыяльнай няроўнасці. Ён таксама пісаў інструментальныя п’есы, працаваў у галіне сімфанічнай музыкі.
Адкрываюць экспазіцыю нотныя выданні шэрагу лепшых рамансаў кампазітара, у тым ліку "Я Вас любил", "Юноша и дева”, "Ночной зефир”, “Титулярный советник", “Старый капрал”, “Мельник”, фантазія для голасу з фартэпіяна “Свадьба”. Сярод экспанатаў – галоўны твор А. Даргамыжскага – опера “Русалка” (1856), а таксама опера-балет “Праздник Вакха” (1848), оперы “Эсмеральда” (1841), “Каменный гость” (1869), урыўкі з няскончанай оперы “Рогдана”. На выставачных стэндах – сачыненні для сімфанічнага аркестра: “Баба-Яга, или С Волги nach Riga” (1862), “Малороcсийский казачок” (1864), “Чухонская фантазия” (1867), а таксама “Полное собрание вокальных ансамблей и хоров”, “Собрание сочинений для фортепиано” і інш.
Другая частка экспазіцыі – аўдыядакументы з творамі кампазітара з фондаў Нацыянальнай бібліятэкі Беларусі. Наведвальнікі могуць паслухаць арыі, рамансы і песні Аляксандра Сяргеевіча ў выкананні Яўгенія Несцярэнкі, Марыі Максакавай, Аляксандра Вядзернікава, Тамары Сіняўскай, Канстанціна Плужнікава, Ламары Чконіі і інш.
Завяршаюць экспазіцыю даведачныя выданні і кнігі пра жыццё і творчасць кампазітара.
Усяго на выстаўцы прадстаўлена звыш 100 дакументаў, у ліку якіх ілюстрацыйны матэрыял.
Кантактны тэлефон: (8 017) 293 27 52.
 |
 |
 |
|
 |
 |
 |
|
 |
 |
 |
|
 |
 |
 |
