З 8 ліпеня па 5 жніўня ў аддзеле абслугоўвання афіцыйнымі дакументамі (пам. 207) адкрыта выстаўка "Гандаль людзьмі: шляхі процідзеяння", прысвечаная Сусветнаму дню барацьбы з гандлем людзьмі.

Гэты Дзень быў абвешчаны 18 снежня 2013 года на 68 сесіі Генеральнай Асамблеі ААН (рэзалюцыя A/RES/68/192) і штогод адзначаецца 30 ліпеня, пачынаючы з 2014 года.Дата мерапрыемства была абрана не выпадкова. У гэты дзень у 2010 годзе Генеральная Асамблея прыняла Глабальны план дзеянняў ААН па барацьбе з гандлем людзьмі.

Ініцыятарам увядзення Сусветнага дня барацьбы з гандлем людзьмі выступіла Рэспубліка Беларусь. Суаўтарамі рэзалюцыі выступілі многія дзяржавы, у тым ліку Азербайджан, Арменія, Расійская Федэрацыя, ЗША, Таджыкістан, Туркменістан і Узбекістан.

У рэзалюцыі адзначалася, што нягледзячы на меры, прынятыя на міжнародным, рэгіянальным і нацыянальным узроўнях, гандаль людзьмі застаецца для міжнароднай супольнасці адной з найсур’ёзнейшых праблем. Рашэнне гэтай праблемы патрабуе больш узгодненых калектыўных і комплексных дзеянняў на міжнародным узроўні і ўмацавання супрацоўніцтва і каардынацыі на нацыянальным узроўні паміж усімі зацікаўленымі бакамі, уключаючы дзяржаўныя структуры, няўрадавыя і міжнародныя арганізацыі, прыватны сектар.

Гандаль людзьмі з’яўляецца сур’ёзным злачынствам і грубым парушэннем праў чалавека. Кожны год тысячы мужчын, жанчын і дзяцей пападаюць у рукі гандляроў людзьмі, як у сябе дома, так і за мяжой. Усе краіны, будзь то краіна паходжання, транзіту або назначэння, пакутуюць ад гандлю людзьмі. Па ацэнках Упраўлення ААН па наркотыках і злачыннасці, у пастцы сучаснага рабства ў сённяшні час знаходзіцца каля 2,5 мільёна чалавек.

Ахвярам гандлю людзьмі, якім пашчасціла вырвацца на волю, неабходна дапамога ва ўзнаўленні праў і пошуку свайго месца ў грамадстве. Гэтую задачу вырашае Даверны фонд ААН для ахвяр гандлю людзьмі. Ён пачаў работу разам з прымяненнем Глабальнага плана дзеянняў Арганізацыі Аб’яднаных Нацый па барацьбе з гандлем людзьмі ў ліпені 2010 года. Фонд садзейнічае дзяржавам, міждзяржаўным і няўрадавым арганізацыям у абароне і падтрымцы ахвяр гандлю людзьмі, дапамагаючы ім акрыяць ад псіхалагічных і фізічных траўм.

Наша рэспубліка адной з першых на постсавецкай прасторы не толькі прызнала наяўнасць праблемы гандлю людзьмі, але і пачала весці актыўную поўнамаштабную барацьбу з ёй.З 2002 года ў краіне рэалізуецца Нацыянальны план дзеянняў, у якім удзельнічае больш за 20 дзяржаўных органаў з прыцягненнем структур грамадзянскай супольнасці, міжнародных і грамадскіх арганізацый. Нацыянальныя меры па спыненні трафікінгу спрыялі таму, што барацьба з гандлем людзьмі стала адным з прыярытэтных кірункаў дзейнасці Беларусі на міжнароднай арэне. Беларусь выступіла арганізатарам шэрагу міжнародных мерапрыемстваў, нацэленых на фармаванне эфектыўнага глабальнага партнёрства супраць рабства і гандлю людзьмі ў XXI стагоддзі.

Матэрыялы выстаўкі раскрываюць розныя аспекты праблемы і знаёмяць з даследаваннямі феномену рабства і гандлю людзьмі.

Выстаўка ўключае наступныя тэматычныя раздзелы:

Праблема гандлю людзьмі: гісторыя і сучаснасць.
Міжнароднае супрацоўніцтва ў галіне процідзеяння гандлю людзьмі.
Пакрыццё шкоды ахвярам гандлю людзьмі.
Міжнародна-прававыя асновы барацьбы з гандлем людзьмі.
Рэспубліка Беларусь супраць трафікінгу.

У экспазіцыі прадстаўлена каля 100 дакументаў на рускай, англійскай, французскай і нямецкай мовах. Вялікую частку экспазіцыі складаюць дакументы міжнародных арганізацый: кнігі, брашуры, мімеаграфаваныя дакументы ААН, перыядычныя выданні.

Выстаўка прызначана для супрацоўнікаў следчых і аператыўных падраздзяленняў праваахоўных органаў, псіхолагаў, сацыяльных работнікаў, суддзяў, адвакатаў, выкладчыкаў і студэнтаў вышэйшых навучальных устаноў юрыдычнага профілю, а таксама ўсіх зацікаўленых станам праблем кіравання працэсамі барацьбы з гандлем людзьмі.

Карысныя спасылкі

Гандаль людзьмі: шляхі процідзеяння

Інфармацыйныя рэсурсы

Паслугі