З 16 жніўня па 30 верасня ў зале нотных і аўдыядакументаў (пам. 305) ладзіцца выстаўка “Фарбы гукаў”, прысвечаная творчасці Клода Дэбюсі (1862–1918).
Клод Ашыль Дэбюсі – французскі кампазітар, піяніст, дырыжор, заснавальнік музычнага імпрэсіянізму.
Сачыненні кампазітара вылучаюцца выдатнай гучнасцю, змястоўнасцю, паэтычнасцю, вытанчанасцю і гармоніяй. Яны звяртаюць на сябе ўвагу рэдкімі сугуччамі і складанымі рытмічнымі пабудовамі, паслядоўнасцю аддаленых танальнасцей.
Асновай творчасці К. Дэбюсі з’яўляецца праграмная інструментальная музыка – «Прэлюдыя да “Пасляпалудзеннага адпачынку фаўна”» (1894), трыпціх “Накцюрны” для сімфанічнага аркестра (1899), тры сімфанічныя эскізы і інш. Адзін з найбольш значных яго твораў – опера “Пелеас і Мелізанда” (1902) па драме М. Метэрлінка, у якой дасягнута поўнае зліццё музыкі з дзеяннем.
Асаблівае месца ў творчасці кампазітара займае вакальная музыка. У рамансах і песнях ён надаваў вялікае значэнне слову, адсюль натуральнасць і нязмушанасць вакальнай мелодыі, часам блізкай да інтанацый чалавечай мовы, у кампазіцыях “Цудоўны вечар”, “Палявыя кветкі”, “Святло месяца” і інш.
Сярод камерных сачыненняў шырокай вядомасцю карыстаецца струнны квартэт.
Гармонія і музычная мова К. Дэбюсі аказалі велізарны ўплыў на творчасць кампазітараў XX стагоддзя і паслужылі стымулам для пераасэнсавання выразных магчымасцей музыкі і пошукаў новай вобразнасці.
На выстаўцы прадстаўлены даведачныя выданні, кнігі і артыкулы, прысвечаныя К. Дэбюсі, а таксама нотныя выданні твораў кампазітара. Сярод іх – балеты “Гульні” (1912) і “Скрыня з цацкамі” (1913), творы для фартэпіяна, у тым ліку “Востраў радасці” (1904) і “Бергамаская сюіта” (1910), эстампы, арабескі і інш. Частка твораў прадстаўлена на аўдыядакументах у выкананні вядучых айчынных і замежных музыкантаў.
Кантактны тэлефон: (8 017) 293 27 52.
 |
 |
 |
 |
 |
 |
 |
 |
