З 13 верасня па 16 кастрычніка ў зале беларускай літаратуры (пам. 205) праходзіць выстаўка “Эпоха і мастак”, прысвечаная 100-годдзю з дня нараджэння беларускага паэта, празаіка і перакладчыка С.І. Грахоўскага (1913–2002).
Экспазіцыя складаецца з шасці раздзелаў, у якіх прадстаўлены творчы і жыццёвы шлях пісьменніка, – “...А песня будзе жыць...”, “Майстэрства пачынаецца з асобы”, “Сонечная сцежка”, “Галасы і вобразы”, “Любоў мая – зямля мая”, “Перажытое і перажытае”.
Сярод экспанатаў выстаўкі – кнігі пісьменніка, калектыўныя зборнікі, нотныя і перыядычныя выданні, у якіх змешчаны творы аўтара. Адметнае месца ў экспазіцыі займаюць першыя публікацыі Сяргея Іванавіча, якія былі надрукаваны ў часопісе “Беларускі піянер” (№ 7, 1926; № 3, 1929).
З маленства пісьменнік далучыўся да паэзіі. Пра гэта сведчыць той факт, што свой першы верш “Змена Ільічу” ён падпісаў: “Піянер Сяргей Грахоўскі”.
У ліку прадстаўленых выданняў – першы зборнік вершаў “Дзень нараджэння”, надрукаваны ў 1958 г. (амаль праз 32 гады пасля першай публікацыі).
Акрамя магчымасці дакрануцца да паэзіі С. Грахоўскага, наведвальнікі выстаўкі могуць пазнаёміцца з прозай аўтара і яго перакладамі на беларускую мову твораў А. Блока, С. Ясеніна, А. Гайдара, Л. Украінкі, Р. Тагора і інш.
Завяршаюць экспазіцыю даведачныя выданні, энцыклапедычныя матэрыялы і шматлікія публікацыі, прысвечаныя таленавітаму пісьменніку, аўтарамі якіх з’яўляюцца А. Бельскі, Т. Борбат, Л. Алейнік, Р. Баравікова і інш.
На выстаўцы прадстаўлена каля 300 выданняў.
Кантактны тэлефон: (8 017) 293 77 16.