З 12 ліпеня па 11 жніўня ў аддзеле абслугоўвання афіцыйнымі дакументамі (пам. 207) ладзіцца тэматычная кніжная выстаўка “Еўрапейская інтэграцыя: вопыт і перспектывы развіцця”.
Адной з важных з’яў на тэрыторыі Еўропы пасля заканчэння Другой сусветнай вайны сталі працэсы інтэграцыі, якія з 1950-х гг. пастаянна пашыраліся як геаграфічна, так і тэматычна. Еўрапейскае аб’яднанне вугалю і сталі, Еўрапейская эканамічная супольнасць (ЕЭС), Еўрапейская супольнасць па атамнай энэргетыцы (Еўратам) першапачаткова складаліся з шасці дзяржаў-членаў – Францыі, Германіі, Бельгіі, Галандыі, Люксембурга і Італіі. Паступова гэтыя інтэграцыйныя аб’яднанні ўключалі ў сябе новыя краіны: Вялікабрытанію, Ірландыю і Данію (1973), Грэцыю (1981), Іспанію і Партугалію (1986), Аўстрыю, Фінляндыю і Швецыю (1995). У 2004 г. да Еўрапейскага саюза далучылася Польшча, Чэхія, Славакія, Славенія, Венгрыя, Эстонія, Латвія, Літва, Мальта і Кіпр, а ў 2007 г. – Балгарыя і Румынія.
Пашыралася еўрапейская інтэграцыя і тэматычна: спачатку інтэграцыйны працэс ахопліваў толькі асобныя сектары – вугаль і сталь, аднак паступова распаўсюдзіўся амаль на ўсю эканамічную галіну, на каардынацыю ўнутрыпалітычных пытанняў і знешнепалітычнага супрацоўніцтва, а таксама на супрацоўніцтва органаў паліцыі і юстыцыі. Сёння Еўрапейскі саюз (ЕС) уяўляе сабой інтэграцыйную арганізацыю з адзінай эканамічнай палітыкай, агульнай гандлёвай палітыкай у адносінах да трэціх краін, адзінай валютай, адзінымі нормамі ў галіне абароны праў чалавека, агульнай знешняй і абароннай палітыкай, а таксама супрацоўніцтвам у галіне правасуддзя і ўнутраных спраў.
На кожным новым этапе інтэграцыі для замацавання ўжо існуючага стану і ўкаранення новых прынцыпаў узаемадзеяння ўся сістэма наднацыянальных інстытутаў ЕС фіксавалася ў форме дагавора. У 2000-я гг. было пачата стварэнне адзінай Канстытуцыі для Еўропы, якая б замяніла ўсе папярэднія дамовы. Аднак канстытуцыйны працэс завяршыўся няўдачай. Было прынята рашэнне адмовіцца ад Канстытуцыі і замяніць яе звычайным дагаворам. Лісабонскі дагавор, які ўвайшоў у сілу ў снежні 2009 г., уносіць істотныя змены ў палітычную, эканамічную і прававую сферы функцыянавання Еўрапейскага саюза і мае вялікае значэнне для развіцця працэсу інтэграцыі.
Глабальны крызіс пачатку XXI ст. аслабіў еўрапейскі інтэграцыйны працэс, але не спыніў яго. Ключавой праблемай на сучасным этапе становіцца распрацоўка ўзгодненай стратэгіі выхаду з фінансава-эканамічнага крызісу, распрацоўка прыярытэтаў, вектараў развіцця, новых канцэпцый.
Для Рэспублікі Беларусь адносіны з Еўрапейскім саюзам – адзін з прыярытэтаў шматвектарнай знешняй палітыкі. Беларусь імкнецца да эфектыўных добрасуседскіх адносін з ЕС, у якіх закладзены сур’ёзны патэнцыял для развіцця эканомікі і дзяржавы ў цэлым. Асноўнымі напрамкамі гэтых адносін становяцца: пашырэнне рынкаў для беларускага экспарту; прыцягненне інвестыцый і сучасных тэхналогій з мэтай мадэрнізацыі эканомікі; забеспячэнне макраэканамічнай стабільнасці і доступ да рэсурсаў міжнародных крэдытных устаноў; свабода перамяшчэння людзей для садзейнічання эканамічным і гуманітарным сувязям, а таксама інтэграцыі Беларусі ў пан’еўрапейскую адукацыйную і культурную прастору, якая фарміруецца.
На выстаўцы прадстаўлена каля 100 публікацый на рускай, англійскай, французскай и нямецкай мовах – дакументы міжнародных арганізацый, манаграфіі, артыкулы беларускіх і замежных вучоных, вучэбная літаратура.
Экспазіцыя ўключае наступныя тэматычныя раздзелы:
- Гісторыя і тэорыя еўрапейскай інтэграцыі;
- Права Еўрапейскага саюза;
- Лісабонскі дагавор: новы этап у развіцці еўрапейскай інтэграцыі;
- Сусветны фінансава-эканамічны крызіс і еўрапейская інтэграцыя;
- Пашырэнне Еўрапейскага саюза і Беларусь.
Выстаўка будзе цікавая навуковым работнікам, выкладчыкам ВНУ, аспірантам, студэнтам і ўсім, хто цікавіцца праблемамі еўрапейскай інтэграцыі і міжнародных адносін.
Карысныя спасылкі:
- Еўрапейскі саюз
- Статутныя дакументы Еўрапейскага саюза
- Гісторыя Еўрапейскага саюза
- EUR-Lex: права Еўрапейскага саюза
- Лісабонскі дагавор (спіс літаратуры)
- Фінансавы крызіс у зоне еўра (спіс літаратуры)
- Рэспубліка Беларусь і Еўрапейскі саюз (інфармацыя МЗС Рэспублікі Беларусь)
- Прадстаўніцтва Еўрапейскага саюза ў Беларусі
- Праграма “Усходняе партнёрства” (спіс літаратуры)
 |
 |
 |
