З 3 па 31 сакавіка ў Нацыянальнай бібліятэцы Беларусі (2-гі паверх, кальцавы калідор) дэманструецца тэматычная кніжная выстаўка "Для цябе, Жанчына!", арганізаваная напярэдадні жаночага свята.
Жанчыну заўсёды ўспрымалі як вялікі дар прыроды, як тую, хто даруе новае жыццё. Яе ўшаноўвалі, яе абагаўлялі. "Мацер Свету. Колькі незвычайна кранальнага і магутнага злілося ў гэтым святым паняцці ўсіх вякоў і народаў. Жанчыны, вы сатчаце і разгорнеце сцяг свету. Вы запаліце ў кожным ачагу агонь цудоўны, які стварае і падбадзёрвае. Вялікая і выдатная справа запаведана вам, жанчынам!", – так сказаў Мікалай Рэрых.
Адзін з раздзелаў экспазіцыі прысвечаны знакамітым жанчынам у сусветнай гісторыі з найстаражытнейшых часоў да нашых дзён. Гераіні гэтых кніг – жанчыны незвычайнага лёсу, іх імёны сталі сапраўды легендарнымі. Тут і тыя, хто адыграў важную ролю ў палітыцы, і тыя, чыім прызначэннем сталі навука, літаратура і мастацтва.
У асобным раздзеле сабраны шэдэўры любоўнай лірыкі, дыяменты сусветнай паэзіі ад антычнасці да нашых дзён, у іх апяваецца прыгажосць жанчыны, яе пяшчота і жаноцкасць. Выкліча цікавасць і кніга "Афоризмы. Великие женщины о мужчинах и любви", у якой чытач знойдзе незвычайна дасціпныя, бліскучыя выказванні такіх вядомых жанчын, як Како Шанэль, Сара Бернар, Агата Крысці, Жорж Санд, Марлен Дытрых, Грэта Гарба і інш. Таксама ў гэтым раздзеле прадстаўлены цэлы шэраг празаічных твораў, прысвечаных жанчыне, сярод якіх раманы Генры Джэймса "Женский портрет", Такэо Арысіма "Женщина", Марыі Арбатавай "Меня зовут женщина", апавяданне Джэрома К. Джэрома "Очаровательная женщина" і многія іншыя.
У раздзеле "Магія жанчыны" чытачкі знойдуць для сябе шмат карысных парад, як правільна выбраць адзенне, макіяж, прычоску і быць захапляльнай кожны дзень.
Кантактны тэлефон: 293-28-86.
Увага! У чытальных залах арганізаваны доступ да поўных спісаў літаратуры, прадстаўленай на выстаўках, якія ладзяцца ў бібліятэцы.
 |
 |
 |
||||||
 |
 |
 |
