З 14 лютага па 20 сакавіка ў зале беларускай літаратуры (пам. 205) праходзіць выстаўка “Даследчык і пісьменнік”, прысвечаная 60-годдзю беларускага пісьменніка і літаратуразнаўца, кандыдата філалагічных навук П.В. Васючэнкі.
Нарадзіўся Пётр Васільевіч 15 лютага 1959 года ў Полацку. Скончыў факультэт журналістыкі БДУ ў 1981 годзе, аспірантуру пры Інстытуце літаратуры імя Янкі Купалы НАН Беларусі, у якім працаваў навуковым супрацоўнікам, з 1997 года – дацэнт, загадчык кафедры беларускай мовы і літаратуры Мінскага дзяржаўнага лінгвістычнага ўніверсітэта. Член Саюза беларускіх пісьменнікаў, член журы літаратурнай прэміі імя Ежы Гедройца, лаўрэат прэміі “Гліняны Вялес” (2003).
П.В. Васючэнка даследуе спадчыну класікаў беларускай літаратуры, творчасць сучасных празаікаў і драматургаў, з'яўляецца аўтарам навуковых прац “Драматургія і час”, “Драматургічная спадчына Янкі Купалы: вопыт сучаснага прачытання”, “Пошукі страчанага дзяцінства”, “Беларуская літаратура XX стагоддзя і сімвалізм”, “Сучасная беларуская драматургія” і інш. Манаграфіі, зборнікі навуковых прац, літаратуразнаўчыя і крытычныя артыкулы, эсэ, а таксама выданні, якія выйшлі пад навуковай рэдакцыяй Пятра Васільевіча, кнігі з яго прадмовамі і пасляслоўямі прадстаўлены ў раздзеле “Васючэнка – даследчык”.
З мастацкімі творамі юбіляра, якія выйшлі як асобнымі выданнямі, так і ў калектыўных і тэматычных зборніках, а таксама часопісах, наведвальнікаў знаёміць раздзел “Васючэнка – пісьменнік”. Для прозы і драматургіі Пятра Васільевіча характэрныя гумар, іронія, гратэск, парадаксальнасць і падтэкст.
Экспануюцца кнігі апавяданняў “Белы мурашнік”, “Прыгоды аднаго губашлёпа” (суаўтар Антоні Вырвіч), зборнік п'ес “Маленькі збраяносец”, кнігі казачных аповесцей для дзяцей “Жылі-былі паны Кубліцкі ды Заблоцкі”, “Жаласлівая каралеўна”, “Каляровая затока”, раман-бурлеск “Дванаццаць подзвігаў Геракла” і інш.
У раздзеле “Формула Пятра Васючэнкі” паказваюцца матэрыялы пра творчую лабараторыю пісьменніка і даследчыка, яго метады літаратуразнаўчага аналізу беларускай літаратуры.
Час работы выстаўкі адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Тэлефон для даведак: (8 017) 293 27 16.
