З 6 па 31 мая ў зале беларускай літаратуры (пам. 205) праходзіць выстаўка “Дар слова”, прымеркаваная да 75-годдзя беларускага мовазнаўца і педагога М.В. Абабуркі.
Імя Мікалая Васільевіча добра вядома ў навуковым свеце. Сфера яго інтарэсаў вельмі шырокая. Ён даследуе мову мастацкай літаратуры, культуру мовы, лексіку літаратурнай і дыялектнай яе форм, стылістыку, пытанні параўнальнай граматыкі, тэрміналогію.
Навуковая спадчына Мікалая Васільевіча – шматлікія манаграфіі, падручнікі, вучэбныя дапаможнікі, вучэбна-метадычныя і даведачныя выданні, праграмы і слоўнікі – прадстаўлена ў раздзеле “Вучоны і выкладчык”. Да ўвагі наведвальнікаў – кнігі “Дыялектызмы ў творах беларускіх савецкіх пісьменнікаў: Кароткі слоўнік-даведнік” (1979), “Стылістычна абмежаваныя словы ў мове беларускай мастацкай літаратуры” (1981), “Беларускае слова і яго вывучэнне” (1986), “Параўнальная граматыка беларускай і рускай моў” (1992), “Культура беларускай мовы” (1994), “Асаблівасці перакладу тэкстаў на беларускую мову” (1999), “Станаўленне і развіццё мовы беларускай мастацкай літаратуры” (2000), “Тэорыя і практыка перакладу” (2007), “Лінгвістыка тэксту” (2008), “Беларуская лінгвістычная паэтыка і тэксталогія” (2008), “Рознастылёвыя тэксты і іх аналіз” (2010), “Лінгвастылістычныя і тэксталагічныя тэрміны” (2011), “Сучасны літаратурна-мастацкі расповед” (2011), “Паэтыка беларускай літаратуры XVI–XIX стст.” (2011), “Размежаванне часцін мовы і іх граматычных форм” (2015) і інш.
Цікавымі будуць і кнігі аўтара, прысвечаныя стылю і мове твораў В. Быкава, М. Зарэцкага, А. Куляшова і інш.
У раздзеле “Ля вытокаў духоўнасці” шырока экспануюцца публікацыі вучонага, змешчаныя ў перыядычных выданнях і калектыўных зборніках, а таксама яго мастацкія творы.
Асобай увагі заслугоўвае раздзел “Складальнік, рэдактар, рэцэнзент”, які асвятляе адпаведную дзейнасць Мікалая Васільевіча.
Матэрыялы раздзела “Жыццёвая сцяжына” знаёмяць з жыццёвай і творчай біяграфіяй М.В. Абабуркі, даюць магчымасць атрымаць вычарпальную інфармацыю пра навукова-даследчую спецыялізацыю мовазнаўца, ацаніць яго ўклад у лінгвістыку, бліжэй пазнаёміцца з дасягненнямі, творчымі інтарэсамі і набыткамі вучонага, яго грамадскай дзейнасцю.
Кантактны тэлефон: (8017) 293 27 16