З 1 мая па 20 чэрвеня ў бібліятэцы (2-гі паверх, кальцавы калідор) размешчана тэматычная выстаўка “Чытаем разам”, прысвечаная Міжнароднаму дню сям’і (15 мая).
Чытанне спрыяе фарміраванню больш развітога, сацыяльна цэннага чалавека. Вялікую ролю ў гэтым працэсе адыгрывае сістэматычнае далучэнне дзіцяці да сямейнага чытання, якое арганізуецца з дапамогай дамашніх бібліятэк. Дзякуючы ім у сям’і ёсць магчымасць выхоўваць любоў да кнігі.
Сямейнае чытанне займае асаблівае месца ў развіцці чалавека. Традыцыі чытання сыходзяць сваімі каранямі ў далёкае мінулае – пра гэта сведчаць незлічоныя калыханкі, прыгаворкі, песенькі, пястушкі, лічылкі, казкі, загадкі…
Першая сустрэча чалавека з кнігай адбываецца ў сям’і. Сямейнае чытанне ўводзіць дзіця ў свет кніжнай культуры. Яно рыхтуе чалавека да ўзаемаадносін з кнігай, падахвочвае і паглыбляе ўвагу, спрыяе ранняму і правільнаму авалоданню роднай мовай.
На тэматычнай кніжнай выстаўцы “Чытаем разам” экспануецца каля 150 выданняў, прысвечаных розным аспектам сямейнага чытання. Асобныя раздзелы ўключаюць найнавейшыя выданні, якія прапануюцца для сямейнага чытання: энцыклапедыі, кніжкі-цацкі, зборнікі беларускіх народных казак і казак народаў свету, папулярныя дзіцячыя мастацкія творы і г.д.
Дадзеная выстаўка – гэта своеасаблівы компас у свеце выданняў для дзяцей.
Тэлефон для даведак: (8 017) 293 28 86.