З 7 па 29 лютага ў зале беларускай літаратуры (пам. 205) праходзіць выстаўка “Часу непадуладнае”, прысвечаная 100-годдзю з дня нараджэння беларускага літаратуразнаўца Н.С. Перкіна (1912–1976).
У трох раздзелах экспазіцыі – “У святле неўміручых ідэй”, “Здабыткі крытыкі” і “Неаслабная сіла памяці” – распавядаецца пра творчы і жыццёвы шлях літаратуразнаўца, крытыка, празаіка, лаўрэата Дзяржаўнай прэміі імя Я. Коласа (1980) Навума Саламонавіча Перкіна.
Сярод прадстаўленых на выстаўцы выданняў – літаратуразнаўчыя працы, якія прынеслі даследчыку вядомасць. Гэта манаграфіі “Аркадзь Куляшоў” (1951), “Творчасць Петруся Броўкі” (1952), “Пятро Глебка” (1955), “Шляхі развіцця беларускай савецкай літаратуры 20–30-х гг.” (1960), “В семье братских литератур” (1967), “Человек в советском романе” (1975), “Абсягі думкі” (1980) і інш.
Наведвальнікі выстаўкі даведаюцца пра тое, што Навум Саламонавіч з’яўляецца адным з аўтараў калектыўных прац: “Нарысы па гісторыі беларускай літаратуры” (1956), “История белорусской советской литературы” (1977), падручнікаў па беларускай літаратуры для IX–X класаў сярэдняй школы і інш.
Асобнымі блокамі на выстаўцы прадстаўлены мастацкія творы аўтара – аповесць “Мальчик из местечка” (1981), зборнік аповесцей і апавяданняў “Я стал партизаном” (1979); а таксама перыядычныя выданні з навуковымі артыкуламі Н.С. Перкіна і ўспаміны яго сяброў-паплечнікаў – Д. Бугаёва, М. Лазарука, М. Мушынскага, Э. Гурэвіч, В. Каваленкі і інш.
Усяго на выстаўцы экспануецца каля 70 выданняў.
Кантактны тэлефон: 293-27-16.