З 11 снежня па 31 студзеня ў Нацыянальнай бібліятэцы Беларусі (2-гі паверх, кальцавы калідор) ладзіцца кніжна-ілюстрацыйная выстаўка “Час у люстэрку экрана”, прымеркаваная да 85-годдзя беларускага кіно.
За васьмідзесяціпяцігадовы перыяд у беларускім кінематографе створаны вялікія мастацкія каштоўнасці як у галіне ігравога кіно (карціны героіка-патрыятычнай тэматыкі, прысвечаныя Вялікай Айчыннай вайне, экранізацыі беларускай і сусветнай класікі, творы для дзіцячай аўдыторыі), так і ў галіне неігравога кіно (фільмы пра падзеі гісторыі, выдатных гістарычных дзеячаў, асветнікаў, кінапартрэты славутых майстроў усіх відаў мастацтва), а таксама анімацыйнага кіно (высокамастацкія аўтарскія фільмы і стужкі, адрасаваныя дзецям).
Гісторыя, традыцыі і сучасныя тэндэнцыі беларускага кіно, роля дзяржавы ў арганізацыі, рэгуляванні і падтрымцы кінематаграфічнай дзейнасці, людзі, чые творчыя біяграфіі ў значнай ступені вызначылі аблічча кінамастацтва Беларусі, – усё гэта знайшло адлюстраванне ў святочнай экспазіцыі, дзе прадстаўлена каля 200 дакументаў розных гадоў выдання.
Кампазіцыйна выстаўка складаецца з некалькіх раздзелаў. Першы з іх – “Кіно – справа дзяржаўная” – уключае нарматыўна-прававыя дакументы, гадавыя агляды Міністэрства культуры Рэспублікі Беларусь, тэматычныя каталогі, матэрыялы кінафорумаў, а таксама энцыклапедыі, дапаможнікі, публікацыі кіназнаўцаў і кінакрытыкаў.
Блок “Скрозь прызму дзесяцігоддзяў” прадстаўляе выданні з пачатку ХХ ст. па тэме станаўлення і сучаснага стану нацыянальнага кіно. Раздзел “У кадры і за кадрам” прысвечаны акцёрам, рэжысёрам, аператарам і іншым удзельнікам здымачнага працэсу. Творчы тандэм экраннага і музычнага мастацваў адлюстраваны ў раздзеле “Крылаты вобраз кіно”. Пра сувязі айчыннага кінематографа з беларускай літаратурай распавядае наступная частка экспазіцыі пад назвай “Роднасць слова і кінаэкрана”, якая ўключае таксама шэраг рэжысёрскіх сцэнарыяў.
Экспазіцыя змяшчае грунтоўную інфармацыю пра месца нацыянальнага кіно ў духоўным жыцці народа, а таксама яго сувязі з экраннай культурай іншых краін. Наведвальнікі выстаўкі знойдуць матэрыялы пра галоўны на Беларусі кінафорум апошніх гадоў – “Лістапад”, іншыя беларускія кінафестывалі.
Багата ілюстраваная выстаўка будзе цікавай як аматарам, так і прафесіяналам кінематаграфічнага мастацтва.
У чытальных залах арганізаваны доступ да тэматычнага спіса літаратуры, якая экспануецца на выстаўцы. Працаваць са спісам можна з любога рабочага месца карыстальніка.
Кантактныя тэлефоны: 293-28-86, 293-29-80.