З 5 студзеня 2009 года ў зале перыядычных выданняў (пам. 106) праходзіць тэматычная выстаўка “Час і літаратура”. У экспазіцыі прадстаўлены публікацыі, што выйшлі за апошнія гады ў перыядычных выданнях.
Сучасны літаратурны працэс надзвычай складаны і супярэчлівы. Па-першае, літаратура на сумежжы двух вякоў своеасабліва падводзіць вынік мастацкіх і эстэтычных пошукаў усяго стагоддзя; па-другое, найноўшая літаратура дапамагае зразумець усю складанасць нашай рэчаіснасці; па-трэцяе, праз свае эксперыменты і адкрыцці яна вызначае перспектыву развіцця літаратуры ХХІ стагоддзя.
Сённяшнюю літаратуру ствараюць людзі розных пакаленняў: і тыя, хто быў запатрабаваны ў перыяд савецкай літаратуры, і тыя, хто прадстаўляў літаратурны андэграунд, і тыя, хто пачаў пісаць зусім нядаўна.
У ліку твораў, прадстаўленых на выстаўцы, - главы з кнігі “Булат Окуджава”, аўтар якой – адзін са значных пісьменнікаў сучаснай Расіі Дзмітрый Быкаў. Твор быў надрукаваны ў часопісе “Дружба народов” у 2008 годзе. Часопіс “Иностранная литература” знаёміць з творчасцю нобелеўскіх лаўрэатаў: у 2008 годзе ў часопісе былі апублікаваны главы з кнігі Г. Граса “Луковица памяти” і п’еса Э. Елінек “Облака. Дом”. Бясспрэчную цікавасць выклікаюць у чытачоў беларускі дэтэктыў М. Клімковіча і У. Сцяпана “Цень анёла”, які выйшаў на старонках часопіса “Маладосць”, а таксама раман А. Паповай “Пузырек воздуха в кипящем котле” ў часопісе “Нёман”.
Усяго ж экспазіцыя налічвае больш за 50 публікацый розных аўтараў з беларускіх і расійскіх літаратурных часопісаў.
Выстаўка будзе працаваць да 28 лютага 2009 года.
Кантактны тэлефон: 293-25-87.
 |
 |
 |
 |
 |
