З 12 студзеня па 4 лютага ў зале дакументаў па мастацтве (пам. 306) праходзіць выстаўка “Чараўнік святла”, прысвечаная 175-годдзю з дня нараджэння аднаго з найбольш вядомых рускіх пейзажыстаў другой паловы ХІХ стагоддзя А.І. Куінджы.
Творчасць Архіпа Іванавіча Куінджы (1841–1910) увайшла залатой старонкай у скарбніцу рускага мастацтва. Неардынарная постаць жывапісца стала легендарнай ужо ў вачах сучаснікаў. Ён прайшоў цярністы шлях ад мастака-самавучкі да мастака-настаўніка, стаўшы адным з самых яркіх майстроў у гісторыі рускага пейзажнага жывапісу. Яго жыццё злучыла ў сабе рысы тыповага лёсу чалавека з народа і непаўторнай біяграфіі адоранай асобы.
Куінджы бачыў задачу жывапісу ва ўменні “ўлавіць і ўзнавіць унутранае адзінства – тое жыццё і той сэнс жыцця, якія як бы рассыпаны ў дэталях і ўяўляюць “разлітую ў свеце першакрыніцу існага”. Гэтай першакрыніцай і было для яго вечнае святло, прамяністая энергія якога дае жыццё і рух светабудове і ўсяму існаму на Зямлі. Больш за ўсё Куінджы цікавіла месяцовае і сонечнае святло і тыя чарадзейныя ператварэнні, якія яно робіць у прыродзе. Ілюзія “свячэння” і паэтычная праўда велічнай і мудрай прыроды асабліва ярка ўвасобіліся ў яго карцінах “Месяцовая ноч на Дняпры”, “Бярозавы гай”, “Украінская ноч”, рэпрадукцыі якіх прадстаўлены на экспазіцыі.
Выразнае асвятленне, інтэнсіўныя колеры, незвычайныя ракурсы ўласцівыя і іншым работам майстра. Мастак адлюстраваў украінскі хутарок, заліты мігатлівым ружовым святлом заходу (“Вечар на Украіне”); увасобіў пакрытыя барвай сонца снежныя вяршыні гор (“Эльбрус”) і сонечныя водбліскі на пышным снезе лесу (“Сонечныя плямы на шэрані”); маляваў неба з праменямі, якія прабіваюцца скрозь хмары, перадаўшы сілу навальнічнай стыхіі (“Пасля навальніцы”). Альбомы, паштоўкі і рэпрадукцыі з гэтымі і іншымі работамі таксама прадстаўлены на выстаўцы.
Дапаўняюць экспазіцыю кнігі і артыкулы, якія знаёмяць з біяграфіяй і этапамі творчага шляху Архіпа Іванавіча Куінджы.
Усяго на кніжна-ілюстрацыйнай выстаўцы прадстаўлена звыш 50 дакументаў.
Кантактны тэлефон: (8 017) 293 27 53.