З 23 сакавіка па 25 красавіка ў зале нотных і аўдыявізуальных дакументаў (пам. 305) праходзіць выстаўка, прысвечаная 80-годдзю вядомай песні “Бывайце здаровы, жывіце багата!”.
Спакойная, светлая, танцавальная, лірычная – сёння песню з васьмідзесяцігадовай гісторыяй ведаюць усе – ад малога да старога. Мусіць, няма такога кутка ў Беларусі, дзе яна не выконвалася б. Твор нікога не пакідае раўнадушным.
“Бывайце здаровы!” – народны шлягер, які ўпрыгожыў рэпертуар Леаніда Уцёсава, Ларысы Александроўскай, Іосіфа Кабзона, Якава Навуменкі, Надзеі Мікуліч, ансамбля “Песняры”.
Падчас Вялікай Айчыннай вайны песня гучала на франтах і іграла вялікую ролю ў мабілізацыі духоўных сіл нашага народа. Тэкст меў мноства варыянтаў: іх складалі франтавікі, партызаны, цывільнае насельніцтва.
На выстаўцы прадстаўлены нотныя выданні і гуказапісы песні ў выкананні розных майстроў. Экспазіцыя таксама змяшчае раздзелы пра творчасць аўтараў – паэта Адама Русака і кампазітара Ісака Любана.
З імем Ісака Любана (1906–1975) звязана фарміраванне жанру масавай песні, дэмакратычнай па сваім вобразным змесце і музычнай мове. Ім створана велізарная колькасць песень, большасць якіх вылучаецца меладычнай выразнасцю і прастатой, танцавальна-бытавой жанравай асновай, інтанацыйнай сувяззю з фальклорам. 23 сакавіка спаўняецца 110 гадоў з дня нараджэння кампазітара.
Адам Русак (1904–1987) – гэта цудоўны паэт-лірык, прычым сам музыкант. Паэзія Адама Русака адметная напеўнасцю, шчырым лірызмам, мяккім народным гумарам, лёгка кладзецца на музыку. Сёння ў народзе жыве нямала песень, створаных вядомымі кампазітарамі на вершы Адама Герасімавіча. А такія творы, як “Толькі з табою”, “Не за вочы чорныя”, “Дзе ты, зорка мая?”, “Не шукай”, “Лясная песня” (“Ой, бярозы ды сосны, партызанскія сёстры”) і іншыя, перакладзены на многія мовы, і сёння іх спяваюць далёка за межамі Беларусі.
Дапаўняюць экспазіцыю дакументы з асабістага архіва паэта – фатаграфіі, пісьмы, рукапіс тэксту песні “Бывайце здаровы!”.
Кантактны тэлефон: (8 017) 293 27 52.
Чытайце таксама:
Адам Русак. Жыццё ў песні