Да Дня беларускай навукі (27 студзеня) Нацыянальная бібліятэка Беларусі прадстаўляе тэматычную кніжную выстаўку «Будучыня за інтэлектам нацыі».
Сусветны вопыт і эканамічныя даследаванні апошніх гадоў паказваюць, што веды становяцца найбольш важным фактарам эканамічнага развіцця, чым традыцыйныя фактары – праца і капітал. Атрыманне новых ведаў і тэхналогій, іх эфектыўнае прымяненне ў сацыяльна-эканамічным развіцці ў значнай меры вызначаюць ролю і месца краіны ў сусветным грамадстве, узровень жыцця народа і забеспячэнне нацыянальнай бяспекі. У Беларусі ёсць усё неабходнае, у тым ліку кваліфікаваныя навуковыя кадры, для таго, каб вывесці нашу краіну на самыя перадавыя рубяжы. У нас створана моцная сістэма адукацыі, якая забяспечвае падрыхтоўку спецыялістаў і вучоных па самых розных накірунках. Усё больш узрастае роля навукі ў жыцці беларускага грамадства, у пабудове інавацыйнай эканомікі. Аб гэтым сведчыць праведзены на пачатку лістапада 2007 года найбуйнейшы форум навуковай грамадскасці краіны – Першы з’езд вучоных Рэспублікі Беларусь. З’езд падвёў вынікі дзейнасці вучоных ва ўмовах незалежнай дзяржавы, дазволіў правесці ўсебаковы аналіз стану і тэндэнцый развіцця навукі, даў ацэнку важнейшых дасягненняў апошніх гадоў у навуковай, навукова-тэхнічнай дзейнасці і ў сферы адукацыі, стаў месцам канструктыўнага дзелавога абмеркавання праблем навукі, вызначыў стратэгію далейшага інавацыйнага развіцця краіны.
Навуковыя дасягненні ў розных галінах грамадства якраз і сталі асноўнай тэмай экспазіцыі выстаўкі, якая налічвае больш за 100 дакументаў (кнігі, часопісы, CD-ROM). Сярод іх:
-
вучэбныя дапаможнікі і манаграфіі, дзе прапануюцца канкрэтныя меры па стварэнні нацыянальнай інавацыйнай сістэмы з удзелам універсітэтаў краіны, рэкамендацыі, арыентаваныя на ўдасканаленне інавацыйнай палітыкі беларускай дзяржавы, разгледжаны вопыт рэалізацыі дзяржаўнай падтрымкі інавацыйнай дзейнасці ў Рэспубліцы Беларусь, дадзены сацыялагічны аналіз навуковага патэнцыялу краіны;
-
зборнікі артыкулаў, тэзісы дакладаў, матэрыялы навукова-практычных канферэнцый (у тым ліку і рэгіянальных) студэнтаў і маладых вучоных вядучых вну краіны; навуковыя працы маладых вучоных НАН Беларусі;
-
каталогі інавацыйных праектаў і распрацовак НАН Беларусі і іншых навуковых арганізацый і ўстаноў краіны;
-
статыстычныя зборнікі;
-
аналітычныя даклады аб стане і перспектывах развіцця навукі ў РБ;
-
матэрыялы Першага з’езда вучоных Рэспублікі Беларусь.
Выстаўка адрасавана вучоным, выкладчыкам, аспірантам і студэнтам вну. Яна размешчана ў атрыуме Нацыянальнай бібліятэкі Беларусі (2-гі паверх).
Кантактны тэлефон 293-28-86.