З 15 чэрвеня па 12 ліпеня ў зале дакументаў міжнародных арганізацый Нацыянальнай бібліятэкі Беларусі (2-гі паверх, пам. 207g) адкрыта тэматычная кніжная выстаўка “Будучыня без наркотыкаў”.
Выстаўка прысвечана Міжнароднаму дню барацьбы са злоўжываннем наркатычнымі сродкамі і іх незаконным абаротам.
Гэты дзень быў абвешчаны Генеральнай Асамблеяй ААН 7 снежня 1987 года (рэзалюцыя 42/112) і штогод адзначаецца 26 чэрвеня. Ён быў усталяваны па рэкамендацыі Міжнароднай канферэнцыі па барацьбе са злоўжываннем наркатычнымі сродкамі і іх незаконным абаротам у мэтах узмацнення міжнароднага супрацоўніцтва для стварэння свабоднага ад наркаманіі грамадства.
Гісторыя барацьбы з распаўсюджваннем наркотыкаў налічвае ўжо амаль 100 гадоў, але і сёння наша грамадства далёка ад вырашэння дадзенай праблемы. У ХХІ стагоддзі наркотыкі па-ранешаму працягваюць разбураць жыцці людзей, становяцца прычынай злачынстваў і ставяць пад пагрозу ўстойлівае развіццё грамадства. Яны ствараюць сур’ёзную пагрозу здароўю і дабрабыту ўсяго чалавецтва, незалежнасці дзяржаў, дэмакратыі, стабільнасці нацый, структуры ўсіх грамадстваў, а таксама годнасці і спадзяванням мільёнаў людзей і членаў іх сем’яў.
Наркотыкі самі па сабе, як хімічныя рэчывы, не могуць быць ні злом, ні дабром: тую або іншую якасць ім надаюць людзі ў залежнасці ад таго, для чаго іх прымяняюць. Але наркаманія, што распаўсюджваецца ў грамадстве, з’яўляецца несумненным злом. Гэта, напэўна, адна самых страшных з’яў нашага сучаснага жыцця, у большай ці меншай ступені гэта хвароба ўсіх краін. Сёння ва ўсім свеце прымаюць наркотыкі больш за 220 млн чалавек, і з кожным днём ўсё большая колькасць людзей трапляе ў залежнасць ад страшнай заганы. Наркаманія вядзе да імклівага росту выдаткаў на медыцынскае абслугоўванне, распаду сем’яў, ін’екцыйная наркаманія садзейнічае пашырэнню маштабаў распаўсюджвання ВІЧ/СНІДу і гепатыту.
У сувязі з пашырэннем гэтай праблемы і сур’ёзнасці яе наступстваў у Рэспубліцы Беларусь пры падтрымцы міжнароднай супольнасці вядзецца эфектыўная работа па супрацьдзеянні назаконнаму абароту наркотыкаў, прафілактыцы наркаманіі і лячэнні наркаспажыўцоў. Рэспубліка Беларусь з’яўляецца краінай-удзельніцай Адзінай канвенцыі аб наркатычных сродках, Канвенцыі аб псіхатропных рэчывах, а таксама Канвенцыі ААН аб барацьбе супраць незаконнага абароту наркатычных сродкаў і псіхатропных рэчываў. З гэтымі дакументамі можна пазнаёміцца на прадстаўленай выстаўцы.
Матэрыялы, што экспануюцца на выстаўцы, раскажуць чытачам і наведвальнікам бібліятэкі пра меры, прынятыя ўрадамі краін і разнастайнымі міжнароднымі арганізацыямі для ўмацоўвання міжнароднага супрацоўніцтва па скарачэнні як незаконнага абароту наркотыкаў, так і іх спажывання, пра гісторыю барацьбы з распаўсюджваннем наркотыкаў і шляхі вырашэння гэтай праблемы на сучасным этапе.
Выстаўка складаецца з наступных раздзелаў:
- наркотыкі і грамадства: гістарычны нарыс;
- міжнародны кантроль за распаўсюджваннем наркотыкаў;
- прававыя меры процідзеяння незаконнаму абароту наркотыкаў;
- папярэджанне і прафілактыка наркаманіі;
- лячэнне і рэабілітацыя нарказалежнасці;
- барацьба з наркаспажываннем і незаконным абаротам наркотыкаў у Рэспубліцы Беларусь.
У экспазіцыі прадстаўлена больш за 60 дакументаў на рускай, нямецкай, французскай і англійскай мовах. У асноўным гэта дакументы міжнародных арганізацый: кнігі, перыядычныя выданні, мімеаграфаваныя матэрыялы ААН (мастхед), брашуры.
Выстаўка адрасавана сацыяльным і медыцынскім работнікам, супрацоўнікам праваахоўных органаў, выкладчыкам і студэнтам – усім, хто цікавіцца праблемамі наркаманіі.
Спасылкі на сайты ААН і сістэмы ААН:
- Упраўленне ААН па наркотыках і злачыннасці (УНЗААН)
- Міжнародная кампанія па наркотыках*
- Барацьба з незаконнымі наркотыкамі
- Дваццатая спецыяльная сесія Генеральнай Асамблеі ААН, прысвечаная сумеснай барацьбе з сусветнай праблемай наркотыкаў (8–10 чэрвеня 1998 года)
- Камісія па наркатычных сродках*
- Міжнародны камітэт па кантролі над наркотыкамі*
- Дзейнасць ААН па папярэджанні злачыннасці
- Дзейнасць ААН па барацьбе з ВІЧ/СНІДам
- Ін’екцыйныя наркотыкі: брудны сакрэт эпідэміі СНІДу
- Аб’яднаная праграма ААН па ВІЧ/СНІДу (ЮНЭЙДС)
- Сусветная арганізацыя аховы здароўя (СААЗ)
Дакументы
- Сусветны даклад аб наркотыках
- Рэзалюцыі Генеральнай Асамблеі
- Даклады Генеральнага сакратара
- Даклады Камісіі па наркатычных сродках
- Даклады Міжнароднага камітэта па кантролі над наркотыкамі
- Дэкларацыі
- Канвенцыі і пагадненні