З 14 верасня па 6 кастрычніка ў Нацыянальнай бібліятэцы Беларусі (2-гі паверх, кальцавы калідор) праходзіць кніжная выстаўка да Дня бібліятэк.
Пачатак ХХІ стагоддзя адзначаецца новым этапам у развіцці бібліятэчнай дзейнасці. У бібліятэчную практыку актыўна ўкараняюцца новыя носьбіты інфармацыі, тэхнічныя сродкі і тэхналогіі. Адкрываюцца новыя магчымасці прадстаўлення інфармацыі кожнаму чалавеку ў любы час, у любым месцы, з любой бібліятэкі свету ў рэжыме онлайн. Пашыраецца інфармацыйная прастора, мінімізуецца час давядзення інфармацыі да карыстальнікаў бібліятэк. Для бібліятэчнага абслугоўвання характэрна глабалізацыя (доступ да сусветных інфармацыйных рэсурсаў) і адначасова яго індывідуалізацыя (прадстаўленне магчымасці спажывання інфармацыі дома, на рабоце, у бібліятэцы).
Сёння бібліятэкі з’яўляюцца важнымі інфармацыйнымі і сацыякультурнымі цэнтрамі, актыўнымі суб’ектамі фарміравання інфармацыйнага грамадства.
Да прафесійнага свята – Дня бібліятэк (15 верасня), Нацыянальная бібліятэка Беларусі прадстаўляе ўвазе чытачоў тэматычную кніжную выстаўку “Бібліятэчны свет”. Экспазіцыя налічвае каля 150 кніг, выдадзеных за апошнія тры гады. Гэта выданні па гісторыі бібліятэк, па асноўных напрамках бібліятэчна-бібліяграфічнай дзейнасці, кіраванні, менеджменце і маркетынгу, сацыялагічных і навуковых даследаваннях, інавацыях у абслугоўванні карыстальнікаў бібліятэк, сучасных інфармацыйных тэхналогіях. Прадстаўлены матэрыялы, якія адлюстроўваюць замежны вопыт бібліятэчнай справы.
Асобны раздзел прысвечаны навукова-папулярнаму часопісу “Бібліятэчны свет”, які ў гэтым годзе адзначае сваё 15-годдзе. На яго старонках заўсёды можна знайсці карысныя матэрыялы, як тэарэтычнага, так і прыкладнога характару, афіцыйныя дакументы, артыкулы па актуальных пытаннях бібліятэчнай справы, інфармацыйныя паведамленні і інш. У часопісе асвятляюцца пытанні дзейнасці бібліятэк усіх відаў і тыпаў, праблемы карпаратыўнага ўзаемадзеяння, вопыт міжнароднага супрацоўніцтва. На старонках часопіса часта змяшчаюцца артыкулы супрацоўнікаў Нацыянальнай бібліятэкі Беларусі.
Матэрыялы экспазіцыі будуць цікавыя спецыялістам і прадстаўнікам розных напрамкаў бібліятэчнай справы.
Кантактны тэлефон 293-28-86.