З 2 ліпеня да 10 верасня ў кальцавым калідоры 2-га паверха працуе выстаўка, прымеркаваная да Дня Незалежнасці Рэспублікі Беларусь (Дня Рэспублікі).
Дата свята звязана з вызваленнем сталіцы нашай Радзімы ад фашысцкіх захопнікаў 3 ліпеня 1944 года, што стала кропкай адліку новай эпохі.
За многія стагоддзі ў беларусаў склалася багатая гісторыя, народ стварыў выдатную літаратуру, музыку, жывапіс, архітэктуру і выразную мову. Усё гэта – каштоўныя складнікі нацыянальнай самабытнасці і адзінства. У суверэннай Беларусі найбольш значныя помнікі археалогіі, архітэктуры і горадабудаўніцтва, гісторыі, мастацтва і нематэрыяльнай творчасці (звычаі, традыцыі, абрады) узяты пад ахову дзяржавы. У сучаснай краіне трэба ашчадна зберагаць і памнажаць гістарычную, культурную і духоўную спадчыну і нацыянальныя традыцыі.
На Беларусі не знойдзецца ніводнай мясціны, якая б не мела сваёй адметнасці. Выстаўка прысвечана перлінам гісторыка-культурнай спадчыны кожнага рэгіёна краіны.
Легендарная і гераічная Брэсцкая крэпасць, найстаражытнейшы лес Еўропы – Белавежская пушча, унікальны драўляны горад XIII ст. – Бярэсце, палацы ў Ружанах і Косаве на Брэстчыне. Помнікі ў старажытных гарадах віцебскай зямлі і прыродныя каштоўнасці Віцебшчыны – полацкая Сафія, нацыянальны парк “Браслаўскія азёры”, ландшафтны заказнік “Ельня” і інш. Выдатныя замкі і палацы знакамітых дынастый, такія як замкавы комплекс “Мір”, храмы розных канфесій і знакавыя гістарычныя мясціны Гарадзеншчыны (Наваградак, Крэва, Гародня і інш.). Захопіць дзівосамі і беларускае Палессе – запаведная прырода нацыянальнага парка “Прыпяцкі”, палацава-паркавы ансамбль Румянцавых-Паскевічаў у Гомелі, “горад старавераў” Ветка, старадаўнія Тураў, Мазыр, Рэчыца, Чачэрск і іншыя мясціны Гомельшчыны. Асаблівую цікавасць выклікае сусветная каштоўнасць – Нясвіжскі палац Радзівілаў, а таксама касцёл бернардзінцаў у Будславе, старадаўнія гарады Заслаўе, Барысаў, Слуцк, Маладзечна, Мядзель, нацыянальны парк “Нарачанскі”, мемарыяльныя комплексы ў Хатыні, Трасцянцы, Курган Славы на Міншчыне. І, вядома, нельга не ўспомніць палацава-паркавыя ансамблі, манастыры і крэпасці ў старажытных гарадах Магілёўшчыны – Мсціславе, Крычаве, Прапойску, Магілёве, Быхаве, Жылічах, Бабруйску і інш.
У экспазіцыі прадстаўлены энцыклапедычныя, навукова-папулярныя і турыстычныя ілюстраваныя выданні, якія дазваляюць пазнаёміцца з неацэннымі скарбамі беларускай зямлі, захапіцца нацыянальнымі багаццямі і скласці свой маршрут для знаёмства з імі.
Дата заканчэння выстаўкі можа быць зменена.
Час яе работы адпавядае рэжыму работы бібліятэкі.
Уваход – па чытацкім білеце або білеце сацыякультурнага цэнтра.
Прадстаўленыя ў экспазіцыі кнігі можна заказаць праз электронны каталог Нацыянальнай бібліятэкі Беларусі.
Тэлефон для даведак: (8 017) 293 29 80.
Матэрыял пададзены аддзелам галерэйна-выставачнай дзейнасці.
