З 13 па 26 чэрвеня ў Нацыянальнай бібліятэцы Беларусі (2-гі паверх, кальцавы калідор) ладзіцца выстаўка “Беларусь і праваслаўе”, прымеркаваная да святкавання ў нашай краіне 1025-годдзя Хрышчэння Русі.
Прадстаўлены выданні XIX – пачатку XXI ст. (каля 200 дакументаў), у якіх раскрываецца сутнасць рэлігіі як грамадскай з’явы, паходжанне, станаўленне і распаўсюджванне праваслаўя на ўсходнеславянскіх землях, у тым ліку беларускіх.
У першым блоку экспазіцыі “З гісторыі праваслаўнай царквы” сабраны выданні XIX – сярэдзіны XX ст. з фондаў Нацыянальнай бібліятэкі Беларусі: жыццяпісы духоўных асоб, падзвіжнікаў і абаронцаў праваслаўя; архіўныя дакументы; акты дыяцэзій; працы і запіскі пра дзейнасць праваслаўных місіянерскіх таварыстваў; гістарычныя апісанні храмаў Беларусі; даведнікі пра святыя беларускія мясціны; павучанні пра розныя ісціны веры, жыцця і набожнасці; апісанні царкоўных і богаслужэбных рэчаў, якія захоўваюцца ў музеях; зборнік помнікаў па гісторыі царкоўнага права (1912); словы, прамовы і пасланні духавенства і г. д.
Другі блок складаецца з наступных раздзелаў:
- “Праваслаўны шлях”
- “Праваслаўныя святыні”
- “Словам і жыціем навучаючы”
- “Беларусь праваслаўная”
Экспануюцца работы па лёсавызначальных вехах гісторыі праваслаўя, асноватворных вучэннях праваслаўнай царквы. Сабраны ўнікальны дакументальны матэрыял і ўспаміны прадстаўнікоў духоўнага саслоўя некалькіх пакаленняў. У выданнях адлюстроўваецца гісторыя распаўсюджвання праваслаўя на прыкладах жыцця, працы і подзвігаў яго місіянераў, пачынаючы з часоў Хрышчэння Русі ў 988 г. і да нашых дзён.
Кнігі знаёмяць з праваслаўнымі святынямі і змяшчаюць жыццяпісы святых, ушанаваных праваслаўнай царквой, іх пасланні, прамовы і малітвы.
Галоўнае месца на выстаўцы адводзіцца тэме праваслаўя ў Беларусі. У кніжных выданнях адлюстраваны шлях беларускай праваслаўнай царквы, гісторыя і лёс яе храмаў і святынь, прыводзіцца іх мастацтвазнаўчы аналіз. Экспануюцца жыціі вялікіх беларускіх падзвіжнікаў і святых: Ефрасінні Полацкай, Кірылы Тураўскага, Георгія Каніскага, Лявонція Карповіча і інш. На шматлікім кніжным матэрыяле раскрываецца значэнне праваслаўнай царквы ў развіцці беларускай культуры.
Кантактны тэлефон: (8 017) 293 28 86.